Joči u joči - mira donadini

Kad me pinku zaboli ferman radit i počnen điravat po kamari. Najprin stavin dvi kapi blagoslov'jene vodice na beštju, zamolin je za kaki-taki suživot i pomolin se, pokajen i oprostin cilen svitu.

Druga je likarija zema'jska: melem-rič s dragin čejadeton.

U ten razmiš'janju, ka naručen, zazunzi telefon. Nastav'jan misal i pričan jon o potribi čovika da se susritne, reče besidu i pobigne, makar na minut, od uliza u sebi.

Nima ništa o' tega kad mi reče: - Tribaš izać, uvatit malo friške arje, 'odat. Sva ćeš se iskrivit po cili dan sideć'… -

Ondac ja upadnen: - A da pojdemo na more, u ribe? -

S druge bande ka da je glas umuka.

- Ajde! Nabavi sve ča triba, ti 'š reć di ćemo i na koju bandu. -

Biće se išempjala kad me čula. Oli je ovo ultimo?, more bit pomislila.

Radi tega, jerbo je sve na svon mistu, omar san našla bilu vrićicu zagropanog vrja koju san spremila prin višje od deset godin. Razmaknila san libre na stolu, odgropala vrićicu i iskrenila tunje, prigledavajuć' i'. Ostalo je još pet pluta. Dva su jemala i udicu i olovo, na jednen je falila udica, na jednen je falilo olovo, a na jednen je falila i udica i olovo. Tunje su bile šesno namotane i prez gropi. Ondac san jopet sve vratila u vrićicu. Ma sad san je ostavila vanka, nek' se zna da misal na more i ribolov nije samo že'ja.

Poćemo pa makar ne mogla ni zaitnit tunju. Nek se makar pogledamo joči u joči: more i ja, da vidin oće li me pripoznat, poslin toliko vrimena?

Pogledan na barometar. Pâ je ka nikad. U jednen danu tri i višje puti se promini vrime.

Di ćemo po ovoj friškeci? čapat puntu?!

Još ni zateplilo i va'ja na peškariju kupit pedoće, očistit i spremit i'. Neka sve bude kako triba, a ne u za'nji čas trkat i tražit naokolo.

Gospe moja! Kad se sitin kako san jemala lipu boršu za ribolov i škatulu za ribe, s bužan na pokrivu. Ma sve!

Kad bi zaitnila tunju pa kad bi pala na dno, kad bi riba prvi put ugrizla a ja onako, ka da ne ću, samo malo povučen, a ondac ona jopet ugrize, a ja činin fintu da je ne ćutin, pa je pustin, da malo otpliva s udicon, pa kad oćutin da je bo'je zagrizla i da potiže, da se ne more višje otet, da je tunja pinku težja… Gospe moja! Koji su to bili gušti, koje vese'je! Kad bi dospila na dubinu di je vidin kako se okriće, pa još kad bi je iznila povrj mora, do sebe, pinku je stisla dok jon izvadin udicu iz just… i ondac? Ondac bi cila fešta bila gotova.

Škatula bi se uvik napunila i uvik je nikor jema dva-tri pjata lipe juve. Bili su to veći špari, dikod i majušni, knez, pirka, ma znalo je bit i lipi pici…

U to san vrime znala sidit na siki po četiri-pet uri, kad bi dobro išlo i višje. Ka inkantana u more.

Kako ću sad? Ko će se popet na siku? Skočit, priskočit? Kako 'š se sagnit, kako sist? Ko će te dignit?

Stat ću na noge. Koliko uri? Ko će te držat?

Vidila san na internetu nike katrige za ribolov. One, ka za režisere samo još jemadu sa live i desne bande žuntu za pribor i ješku. Pa di bi s ton katrigon? Ko će je nosit? Neka je lagašna i fika se na boršu, ma za sve te bagaje, pari mi se, da bi triba i fakin.

Još prin tega bi tribalo poravnat tle, istuć sike… Onako ka ča su to napravili po otocin, svaki prid svojon utvrdon, do u more.

Prin puno godin, bisna na te vlastodršce, stavila san ješku na udicu i otplivala pinku da'je i itnila tunju. Gospe moja! Kad je riba zagrizla, a bila je to pinku veća i jača, i počela potizat, a ja nju, kad je ona počela livo-desno, zapličat mi se oko nog' umrila san o' straja. Evo ću umrit infašana ka faraon! Počela san arlekat. Finalmente me je dobri svit spasija: mene i ribu. Nikad višje tak'i ribolov! Ma i tak'e lovine.

Eto, kako jeman, u kamari, i na katrigi i u kočeti, tempur, sitila san se da bi bilo dobro, da nikor izventa katrigu za ribolov od tempura, ča oće reć, da bi tako čovik moga sidit na svakakvin sikan i bovanin.

Ajde! Kad smo sve špjegali ča i kako bi tribalo bit okolo nas, da bi čagod ulovili, ajmo vidit ča mi sami moremo.

Livon rukon jedva mogu potegnit pjumin za pokrit se po kostin. Rame klapa ka da se svaki put kad ga maknen, otk'juča i zak'juča. Desno ne ću ni spominjat jerbo san livoruka i s desnon niman mota.

Kako ćemo ondac?

Lipo, prijate'jica će itat tunju, ja ću stat atento i potizat, ako se čagod uvati na udicu.

Ajde, fala Bogu da me je dopalo i čagod radit, a ne samo fantažat.

Samo da na kraju i ja ne postanen ka jedna Dinka ča je onji tanto tribala partit, kako bi znala reć, 'u seoski turizam'. Vadila bi valiže, pakirala se, otkazivala boravak u domu za desetak dan, pozdrav'jala se sa sviman, a ondac bi je, sutradan, obilazeć' stare jopet našla u njezinoj kamari, na iston mistu, kraj valiža.

- Asti sto miši! A ča se dogodilo, zašto niste partili? -

Na drugoj kočeti stala je otvorena valiža.

- Eto moja Socijala, za ovi put ništa. Pâ mi je portafoj u banj, vas se smočija i pinezi, stavila san sve sušit. Lako za to, mogla san ja partit i sa mokrin, ali mi se ne dopada ti znak i ne znan ča to oće reć. Sigurno ne dobro. Mogla bi se dogodit dižgracja a di san onda, ko će s menon tako staron? Zato san dala našoj Desi da mi kupi jedan pravi, pravcati livanjski sir. Cilu glavu! -

- Ajme meni, pa di ćete ga držat, to će Van puno vonjat?, dodan ja.

- Bome u vrićicu i na gvozd o' ponistre. -

Ondac se jopet praznila valiža, roba se vraćala u armerun, a 'seoski turizam' je osta samo pusta že'ja naše smišne Dinke.

Ni ja višje nisan za nikak'i turizam, ma pinku se protegnit do nike stare pošte, makar tunju spustit prid sebon, uplitko, i gledat kako se one najmanje igraju oko ješke, to bi jur mogla. Divertit se s njiman i priznat da smo jednako malešni ka ča smo uvik i bili. Ma one će još rest i varat će i' ničije udice.

Moja se fermala i triba jon ruka. Prijate'jska, do pošte, more bit samo do plićaka.

Ako ne dospijemo do te štacije jopet će bit dobro.

Važno je da je sve na svon mistu, da od jučer vrićica visi na katrigi i čeka, pa ča Bog da! Ako ništa, potrošili smo pinku vrimena i u'ja u svići.

Fala Mu za fantažiju, za jubav i punu škatulu sitniša s probužanin pokrivon ča još uvik vonja friškinon, i koprca se uz za'nje rešpire mog sićanja.

Split, 25. ožujka 2008. god.