Judi se višje ne znadu srist. Ne znadu se njanci pripoznat. Ne razumidu nas kad jin oćemo dobro. Zaudobili su ga, joli nisu intrali na njega.
    ča se to dogodilo s nami?
    Prin niko vrime, dan libar ženskici ča prodaje u je'noj knjižari. Rečen jon da će brzo dobit ogledni primjerak o' nakladnika, a oti libar jon ostavjan na dar. Još san napisala nikoliko riči, ka, Bogu fala za nji, za njiovu knjižaru u mon gradu.
    Ma, ona ne će da vazme libar. Ni čut. Ne obadaje. Straj je uvatija. Ne će ona dat svoj potpis. Oni in to kratidu. Ona to ne more, ne smi i gotovo.

 

 

    - Ma, koji potpis? Ne tribate vi ništa potpisat. Ovo je van na dar! Kako ne razumite?  Ovo je ka da san vas susrila na ulici i darovala van libar. To je van, ča prodajete ovod. To je fala ča me pozdravite svaki petak, kad ulizan u vašu butigu. -
    Ma, nima ništa o' tega. Mala sumnja. ča to oće reć, zašto bi jon nikor, joščec nepoznat, da libar. Učinija jon morebit dobro, trata je…
    - Nemojte se jidit, ma ja to ne smin…! -
    Gospe moja, ča je ovo? Ma, nisan falila. Bila san u butigi di se prodajedu šterike i očenaši, slikice o' sveti' i libri. Lipi, dobri libri.
    ča san napravila, di san falila?
    U libru ni bija bili praj ni bomba. Ma, bija je ekploziv o' dobrote.
    Vratila san ga u boršu i izašla.
    Ma nisan otresla prašinu prid vratin o' butige.
    Vratit ću se.