- Sutra gremo u napad na Perinu kamaru! - rekli su mladići iz Reto centra iz Solina. To oće reć da idu pituravat zapušćenu Perinu sobu.
    Tribalo i' je čekat. Kod njizi ni lako doć na red. Jemaju vele posla. Triba li iz kuće izbacit starudiju joli stare aparate, oni to učinidu. Zoveš i' na telefon, a oni ti omar kažu dan i vrime kad će arivat. Ako jemate stari aparat, koji se još more popravit, a oćete ga itnit, a ne morete to sami, jer puno piza, jopet nazovete Reto. Oni će doć, vazest ga i odnit, popravit ga i po nevelikoj cini prodat u Sućurcu.
    Svit govori da jemadu o' katrigi i koćete do svakojaki makinjic. Ni novo, ma je popravjeno i
more se duperat.

  

     čisti su i uredni. Znadu se ponašat. čoviku i' je drago vidit tak'e. Dođedu u kompaniji trojica -četverica. Nije to nika meškinjasta mlajarija.
        Umrla san o' straja kad je jedan o' njizi sam vazeja u ruke veliki ladnjak i počeja ga nosit niz skale, u rukan, ka dite. Prijateji su dobacili:  - Ne bojte se! On je ka Mosor. -
        Gleda i' čovik i ne more virovat da tin moncin ni jema ko pomoć i svitovat i' kad su još ka dica upali u drogu.
        Danas ulazidu u grad ka pravi judi. Ne sramidu se nosit starudiju, ukrcavat je, popravjat, vozit veli otpad, lipo se ponašat... Milina i' je pogledat.
        Naša dica to ne mogu, najskoli ne po danu, da i' ko ne vidi, da in se naruga i ne vazme i' u đir, a navečer moraju ić' vanka.
       E, sad je i naš Pero doša na red. Reto mlajarija ujutro će ulist u njegovu kamaru, na kraju grada, koju nazivjemo Ajme! 
        I njiov je meštar proša pakal o' droge. Ma, da bi mogli doć do zidova, triba najprin iznit i bacit u škovace sve ča je u sobi. Sve. Kako ne'š? Sve ča jema je po tleju, izvrnuto, šporko, izgnjijalo, blato. Zidovi su uništeni. Sve je staro i ne more se višje duperat. Pere i ne zna ča je
ča i zašto ča triba. Jedva da čovik more ulist i donit mu obid.
        Danas su počeli veli diškorši. Dogovara se ča, kad i kako va'ja počet radit. Najprin, Peru va'ja cileg uredit, robu i krpe bacit u škovace, donit vodu u maštilu, jerbo nima vode u kamari, svuć ga i stavit točat, ošišat i obrit, odrizat mu nokte na rukan i nogan i obuć ga u čistu robu.
     Ona je dogovorila da će uređenoga i čistega Peru ujutro odvest tonobilon njegovon prijateju, na drugi kraj o' grada, s kojin se ni vidija pusto vrimena i da će tamo ostat nikoliko dan, dok kamara ne bude gotova.
       Dok je redila Peru, zazvoni mobitel. Muški glas moli je da omar dojde u niku kuću, di stari čovik samo ča ni izdanija. - Brzo, priša je! - reka je.
        Za kratko vrime bicikleton prileti s jedneg kraja grada na drugi i prispije u je'nu velu kuću, parilo se, dobrega svita. Dojde do bolesnika, starega, ižvampivenoga. Isplazija je jazik. Ma ne zna ništa reć. Oni okolo ne razumidu ništa, a otili bi mu pomoć. Ona reče da donesu vrč vode. Napuni čašu i napoji starega. Je'nu pa drugu čašu, pa malo poslin još je'nu. Starac se pomalo smirija, jazik je vratija u justa i zakunja.
    - Jeste li vi žedni po ovoj vručini? - pita ona njizi. - Kako van ne padne napamet da bi se i on napija, da je i on  žedan!? Dajite mu čaja, vode! Bit će bo'je! -
       Kad je vidila da i' jema puno, sve jedan do drugega, muškići, pita i' jemadu li kakve gaće i papuče za sirotinju koja nima ča obuć.
        Glavni o' njizi reče da nimadu i da jon tristo kunic. - Eto ti, pa mu kupi gaće i papuče. -
      Kad je naslonila bicikletu na cablo kraj pazara, dan je već iša kraju. U za'nji je čas prigledavala robu i papuče, koje su prodavači već spremali u škatule. Bilo je gotovo za ti dan. Ma, ona je našla gaće i papuče. Sve za 280 kunic. Sritna li je, Gospe moja!?
        ča će Pere figurat ujutro, kad ga ušesni i odvede tonobilon kod prijateja.
        Da mi je vidit kamaru kad bude pospremjena, kad u nju ulize nova posteja, stol, katrige, novi sudoper, voda, tle. Kad bude čisto, kad roba bude oprana, obid donesen, kad svaki dan čuje prijatejski glas: - Di si, Pero? Kako si? Bog, Pero! -
      Fala ti, Isuse, ča nan svaki dan pokaziješ ča di tribamo radit, ča je vridnije, da riči morebit i ne triba trošit prez potribe.
        Oće nan reć da višje o' riči triba činit dila. Dila su mu dražja.
    To ča ćemo svi mi bit sritniji radi Pere, on to ne će razumit, ali će ositit teplinu pospremjene kamare, u koju je ulizla dobrota.