Ajme meni, svitu moj! Koji divertimenat besidon čini čovik čoviku? A ona, ka za dišpet muči. More bit o' straja, da ne bi dospila u libar.
Beli se. Pokažije cr'jeni jazik. Otvorila je justa. Grlo je zabolilo. Di'š u ovo vrime s priladon,  Gospe moja?
Ma, ni influenca, vengo se jazik i grlo umorilo, proprio je grata iznutra. Ovo je nika nova bo'jetica.

 

 

Kako ne će, kad telefoni i mobiteli zvonidu jedan za drugin i ne fermaju se cili dan. Mora bit da smo bidnu našu dobro ozračili.
Naman penšjunatin je najdražje kad se dobro napapamo, vazest slušalicu i zvat, pitat je, požalit se, tražit, izventavat, samo da moremo čakulat. Briga nas ča se ona cidi o vručine, ča nima vrimena za obid. Mi ćemo je isto zovnit svaki dan. Za ništa. Nek zna da smo živi i kako nan je. To je vele važna noticja. Jema nas po kojin bi čovik moga navit leroj.
Kad vidimo da smo je skonšumali, žaj nan je, pa je jopet zovemo, jer se triba škužat.
ča moremo, jer nan je sve pustila? Ko će nas čut, ko letit za svaku našu, ka bena, očistit, kupit, donit, ako ne ona? O'š pelenice ol' inzulin, o'š prominit posteju, o'š popravit struju. O'š na športelin o' letrike molit da in vratidu struju i zaklet se da ćedu vratit dug priko penšjuna? O'š in tako učinit i za vodu? Za one najnesriknjije i najbidnije.
Vratit in svitlo, vodu. Di su oni ča in nosidu teplu vodu, jer nima letrike a triba i' očistit i oprat? Di oni prez vode, ča stojidu u bužan, di se bukalini i šporkica nosidu vanka, jer se nimaju di prolit? 
Asti sto! Mi ča jemamo telefon, ča je išempjajemo za svaku, mi smo o' vele grandece i ne bi nas tribalo obadavat.
    Ka i nan, prispit će i njon vrime kad višje ne će moć da'je. 
    Ko će se pridat za ovake? Za one ča dolazidu pozan nami?
Oće li Bog koga providit?
      Jesmo li dikod bili dobri? Je li u nan bilo duše za ovake, za druge? Jesmo li se dikod fermali i pomogli drugin, joli smo govorili da nismo rojeni za taki posal,  okričali glavu i bili vele fjeni?
    Dok još moremo odat, izajdimo pinku vanka, projdimo po gradu, susistvu, more bit da nikoga i vidimo, pripoznamo, ošervamo se za nikin. Fermajmo se!
Jutros govorin ženskici na športelinu o' pošte neka pogleda piz o šakuperti koje šajen i napominjen jon da su sve tri istoga piza, a ona me pogleda i doda : - A moja gospojo! Di bi prispila kad van ne bi virovala? Ja van virujen i znan da me ne ćete privarit. - O, kako je to bilo lipo čut.
Inšoma od kuće do pazara, priko Geta nisan nikoga intrala. Dobro je ča san morala ulist u papirnicu vazest kartu, fermat se i progovorit koju. Bilo je to s finin sviton i 'ju'ski.
Sitin se uvik starice koja je ulizla u butigu o' robe samo da koga more pozdravit, da reče besidu. Da jon nikor o'zdravi. Ništa ne bi kupila, ništa jon ni tribalo. Samo besida. Kad se prodavač o' butige pravija da ništa ni čuja ni razumija pa izaša prid vrata i ferma se dok starica ni izašla vanka iz butige… Svaki put kad se tega sitin, dojde mi arlekat od tuge. Ondac znan da jeman dušu, znan di je, znan da me boli. Znan da je to duša moje Matere.
Nisu oni krivi ča je svit izventa nike stvari bo'je o' jubavi, ča je toliko mista zauzeja 'lad u njijovin famejan, ča i' je toliko mutavi. Kako će ondac dica dat ono ča nisu primila?
Ja se uvik trudin, judiman u dućanu reć koju lipu, pinku se nasmijat i njijov more bit, ne uvik lip pogled, primit prijatejski. Ne dan se, i gotovo! 
More bit da višje nikor ne more izać iz kuće, napravit skale, movit se? More bit da su niki i partili kod dice? Ma, nisu svi betežni ni jadni. Je, niki su nas ostavili.  ča je da je, tribimo se.
Vruče je. Besida se umorila, ali ni umrila.
Samo da je besidâ!