Pari se,
vrime te umorilo
piz korak ti okova.
Sve ti teško,
postol po tleju ti
klapa,
dištonaje.
Ka da se noga natrudila,
štufala,
da ne gre daje,
da se košćice bunidu,
primišćaju,
krividu,
po svon se namišćaju.
Ma ne moreš i dricat.
Pa zastenješ.

Privati,  sve si pasa,
vidija i naša.
Čuda višje nima
i veseje sad je
poltrona, katriga.

Pa da jemaš
i rodila da si,
rekla bi ti dica:
Ća si stala tote?
Finilo je nona,
koćeta je za te.

Ne mo' š savit škinu,
grubo ti se sagnit.
Ovod meju sviton
ća gušte još traži,
ti ka dišpar stojiš,
korak driti vataš
tilo gingaš,
naprid bacaš.

Ka da priša arivat je,
šuma čeka i osta će
čvrčak cvrči umuknit će.

Sam sa sebon mučat
lik je.
I hodiš i projdeš
I nazad jopet dojdeš.

Ma ne bi tuka more,
šumu ne bi čuja
ni cvrčke budija
iz kamare svoje.

Ala! Nek si pinku napravija fintu
da si bi u đitu,
da još pinku moreš.
Ma, ne moreš!
Ne moreš!

Od vrimena vazmi ono ća ti daje
ništa priko mire,
na bokune male,
pa odmori oči
zaklopi i',
putuj prez biljeta,

ni triba borša,
samo mali kušin
i tvoja koćeta.

Stari Grad, 27. srpnja 2012. - 27. srpnja 2013.