Ne ćemo jon višje spominjat ime vengo samo ča čini, kako ka na udicu lovi i čapaje dobro a s jutin ostin dotuče svaku zločestoću.
Fali mi ime, a ona neka brontulaje. Ma, ja ću dikod dodat i reć ga u zaminici, pa će bit ona, njon, i Bog zna kakvo sve do kraja libra.
Umisto odanja, kojeg je sve manje, i uvo je pinku zatajilo. Ma, ja ću je isto pomno slušat, morebit, koju i nadodat, da zadovojin gušte.
O prvon libru je palo lipih riči. Svi su se takali za spli'ski govor. On me priteže još od prvega svita.
Va'ja me more, gingolaje, škropidu me vali. Stojin na mistu. Sidro je duboko ureslo u dno. Ne ću ga primišćat.
Ošervajen se i uvik jeman ča vidit.
Morebit, jedanput na šetimanu dojdemo do treće šentade iza Ambasadora. Jedva dočekan sist. To je misto s kojeg gledan koliko svit putuje, gre i vraća se. Brodi samo ča se ne guraju, a jahte, ka za dišpet, nasrid porta fermane. S mog kantuna, pari da ćedu se svaki čas sudarit.
Ona s mobitelon cilo vrime litrataje i ondac me pita je li dobro, a ja ronjan, perke je sve to malo i sitno za moje oči, kojin triba sve povećavat.
Vrime je od đirade. Prolazi svit, prolazidu popići, pratri. Svi ozdravjadu. Niki se i fermaju. Pitanja su jopet, uvik i samo, o nevoji starega i betežnega svita. Ne mo'š se sakrit, draga moja.

Jučer se otrovala jedna starica jer se pripala da će je ćer stavit u dom. Asti sto! Kako to?  ćer je samo tila da materi pomogne, dok nje nima da nikor dojde, da jon da ruku… More bit da je mater krivo razumila. Nije za ništa ona stara: - U straju su vele oči. - Inšoma stara je popila dvi škatule različiti likarija i još ne znamo kako će okončat? Morebit da je i ćer rekla koju višje, onako, ka ča bi njon mater rekla, kad je bila malešna: - Ako ne budeš dobra, stavit ću te u dom. -
ča je da je, grubo je. Ne vaja svaku zapametit. Impakajmo samo ono ča je bilo lipo. Sve drugovačije zaudobimo i oprostimo.
Najdimo pinku vrimena, ne prišimo, neka i oni ne budu ka dil o' kredence. Fermajmo se! Morebit da će nan reć koju rič, misal koju ni oni nan nisu prispili reč navrime, pa jin je sad žaj. Mučite, oni ne tribaju vaš savit, oni će ga van dat.
Vrime je najpotrebnije čoviku. Ono čini da čovik urani oli da zakasni. Ovo drugo je mlogo grubo. Bog nan ga je da svima ka i dare.

 

Mlogo fameja jema kuću za odmor. Nikad dosta, uvik je nika potriba. Natirala ji je na 'turizam' afitavanje, prodavanje usluga. Rasporedile su posal, odmore i partili. Lito je prin počelo, more se napunilo gostin, krenija je posal. Zagledaju se je'ni drugin u ponistre, brojidu se gosti, trčidu, vataju veze s agencijan, ko će višje, ko boje čapat. Stanovi su ostali zatvoreni.
Prešidente je o' jedne fameje ariva tražit pomoć za oca. Dva narašćaja moraju 'na posal, a tu ostaje 'piz', s kojin ne znaju ča će, ni di će: Otac, Did, Pradid. Devedeset mu je godin. Ne more trkat, ali sve razumi. U popunjavanju kuće zaudobili su kočetu za njega. Nije za bacit, ma se ne more stavit s gostin. Dogovorena je pomoć, triput na dan. Did jon je omar, na kraju prvega puntamenta, čvrsto stisnija ruku i prišapnija jon: - Dojdite! Tribate mi. Mlogo bi volija s vami razgovarat. -
Morebit da stari Did ne more razumit naš posal i da je pristar, da se miša sa strancin i smeta jin. More bit da mi i ne znamo, oli nikad nismo ni vidili lipe stare litrate, na kojin su naši stari štivani s četri narašćaja bili glavni, pa ondac i ne znamo kako bi to bila lipa slika, koju bi stranci kurjožasto gledali: uređenoga i mudrega Didu u dvoru o' kuće.
Morebit da je i Didov dil u temeju kuće, da je i njegov penšjun na 'rpi,  ali to nikor ne obadaje. Neka ga tu, nek' se odmori od nas a i mi od njega.
Blago pasu, ča je pas. Ma, on je jubimac, sve dok ne izdane.
Bože! Daj nan sviman vrimena. Ne triba nan mlogo. Samo pinku, da se ošervamo oko sebe i, makar prin sna, projdemo u mislin dan koji ostavjamo. Zašto, za koga san danas živija? Jesan li koga posluša, čuja, bija o' pomoći, razumija različite, kokolava one ničije, obične, jesan li makar nastoja pinku zla pritvorit u dobro, pozdravija one koje nikor ne pozdravja, radit ono ča nikor ne će, ča je sviman teško? Mogu li još naprid? Ne znan.