Moji su puti
u tle zamiš'jeni.
Njijovin je stopan
misal zarob'jena.

Sa zemjani' tragov'
prašinu bi trali,
travčicu izreslu,
ka cvit bi čuvali.

I krive smo pute zapantili,
uspinjuć i spušćajuć se.

Durali smo s tovaron na duši.
Sićanje nan bilo ponos,
posram'jeno nije nikad,
prez mače ka suza čisto.

Nikor ne će na te pute.
Ja i' jedva pripoznajen,
očiman i' prikopajen,
rukon diran teplu zem'ju
tražin stopu o' koraka
stav'jan svoju pa i' mirin
koliko je tôt još force,
oće li me ponit sebon
ol' ću iščat nike nove.

Obični su oto puti,
govoridu mlogo tega,
prašinu in triba otrat,
zemju o'krit,
put pripoznat,
vrime spremit
i zakopat.

Pozan tega neka gradu,
nek' dodaju ča i' vo'ja
ja ne moren, ja ću tote
za navike fermat korak.

Split, 14. srpnja 2007. god.