Ajmo ća vidit ća se to dogodilo, ajmo vidit koliko to kantuni jema ovi ludi grad. Sve se pomišalo, pametni se pravidu ludi i ludin ostavjadu mista da se pokažijedu, jerbo oni to znadu boje.

Najprin, puno i govori, svak za se i svoj tobolac, pa mi se pari, da bi boje bilo da držidu kuco.

Niki se cukun dositija, pa muči. More bit čovik misli da višje nima ća za reć. Sve je to u dlaku isto.

Mogli bi do vičnosti brojit kantune meju sebon, svaki je oštar ka mač – u dušu te rani. A kako ne će, kad si i ti čovik s ovega tleja.

I ja bi volila da svi umuknu, pa ako ko misli da zna čagod ća drugi ne zna, neka pokaže, neka mu se ondac prižentaju i drugi, ma prez beside i neka radu. Neka to pokažedu svitu pa in ne će tribat pusti banci, ni posteri, ni litrati od dva metra, ni skupjanje potpisa po kantunima o grada. Nima te makinje na svitu koja će uvećat ono čega nima.

Priča mi dobra prijatejica, kako se sića siromašnega ditinstva, punega dice. Dok je prolazila s materon kroz selo, na zemji je vidila jednu jaglu, sagnila se, vazela je i pokazala materi koja je omar rekla: To ni naše, vrati di si našla, to je nikor izgubija pa će nać, kad bude prolazija. I ona je poslušala mater i zapametila za cili život tu jaglu.

A sad bi otila reć besidu o drugovačijima, o lupežin.To je čovik ća krede, koji ne more prez tega živit. Prin je to bija odrpani, bosi mulac koji bi ti utira ruku u žep oli boršin, ukreja takvin i pobiga, a danas je to čovik na dajinski, javja se, priti, govori koliko će ti vazest, napada lupeža onega prin sebe, jerbo mora ukrest i dil koji je on zaudobija, oli ni prispija lambrit. I tako se odozgar do doli - zovedu to vertikala -, krede i bere ća je još ostalo. Svak u svoje vrime, fala Bogu. Ondac vidin i njiove gušte, ća ko voli, ća mu najviše triba, ća fali, za čin žudi: Od kuće do tonobila, umjetnina, glisera, kuća u inozemstvima, europama. A di' š moj čovik, kad se podno Medvidnice tle počelo klizat, vidikovci se nakosili ka toranj u Pisi. Nekretnine u zemji buže otvaradu.

Pari se, ka da te stislo u prsin od sve te nevoje. I ne mo' š nikoga napast ni tužit, nikoga na Katalinića brig poslat, jerbo su sve to naši lupeži, svisni, pravi, poznat svit. Ni triba Interpol ni tiralice, svi su tu okolo nas, smijedu se i zabavjadu nas. Ma pari mi se, da nima višje mista u remetincima.

Onome gulanferu će smanjit kaznu jerbo prez njega ne moremo izać iz krize. On bi, ka radija za opće društveno dobro. Ajme, ća su ovo dobro izventali! Ako je tako, ja bi mu omar dala da minja pelene staren svitu u domu, da se osvisti i vidi kako i di život završava. U pelenican, lupežu moj, ne na Cipru ni Divićanskin otocin i po tujen svitu.

Ko bi se sad moga pametno štivat? Na koju bandu? Ko je pravi? Ko laže? Ko podmeće? Ajme meni, a ća bi bilo da se srušija koji komad zemje, ulega, propa, buža da se napravila na putu prema Banovini, da je ne daj Bože, progucala Poglavarstvo. Ća bi bidni mi? Ko bi nan pomoga, spasija nas o nevoje?

Ondac mi dojde upamet oni ća, ne da muči, vengo ne zna govorit, ne zna ništa, (ne virujen, to je samo zal jazik), ne gre na sastanke oli se u po šedute zaželi vidit sina pa gre ća. To će reć pravi ćaća!

Vasko Lipovac: Biciklisti

Uspija je s Božjon pomoći i pomoću svi nas pučana napravit zapadnu rivu. Ne svojin pinezima, ma tu je, vaja priznat, uz naš i njegov milodar. Ća se triba jidit na čovika koji ne zna govorit. Mutavi, Bože prosti, govoridu na mote i mora bit da oko sebe jema taki svit koji poznaje ti jazik i razumija je kad i ća kome triba napravit. I ni moglo boje ispast.

Vasko Lipovac: Biciklisti

Beside o predizbornom triku i vlaškoj furbariji ne ću čut: Čula san ka dite, da su uvik bile tri glavne furbarije: vlaška, braška i udbaška. I ća ćemo sad prominit tote? Nek svak izabere onu koja mu se pari najbližja, onako – domaća.

Mene čudi, kako nikor ne pita ko je projektira ovu lipu zapadnu rivu, koji je arkitekta tako lipo štiva u naš zapušteni grad, pa da ga vidimo, da mu zafalimo, kako Bog zapovida. Ma o njemu njanci beside.

Najdražji su mi oni ća su se najidili i nisu došli na otvaranje nove rive, pa su ostali za dišpet sidit na Matejušku i brontulavat. Ma vidi ti đeložije.

Gušta čovik vidit mlađariju, dicu na bickletan, dvokolican, svit na šentadama, šetače. Široko, nikome tisno, bili kamen tek oće reć, kako bi bila lipa glavna riva da ni bilo veli čarobnjakov.

Odavna san ostavila điradu do Zvončaca, ma ova me zapadna riva potegla u jednen danu dva puta u vižite, pa san je i jučer jopet ponovila i odit ću dok bude force.

Svitu moj, ća je lipo fermat se meju kamenin pločan i proštit imena naši olimpijaca; srce ti bati o sriće.

Ko je - da je ovo napravija, junak oliti junaci, triba in dat da potegnu cimu prema Ambasadoru, i napravidu ća se mora napravit, jerbo je ovo dugovična sramota grada.

Ambasador na čekanju!

Nisan zaudobila otel Marjan. Umuknimo, dosta je bilo besid, rukan se radi. Da Bog, pa i bude tako!

Vraćamo se nazad i kako ostavjamo novu rivu, ka da se vraćamo u dišperacjun, omar ti fali ona bilina, svitlost.

A ono najlipje je neprigledna kolona svita, koja ti arivaje u susret, mladosti inamorane, ća gre prema novoj rivi di smo in ostavili prazne šentade.

Guštaj Splite!