Nima ništa lipje vengo kad čovik čoviku viruje, kad gleda u nj' ka u Boga.
   Ako je čovik dobar, ondac mu iz očiju ćiri Bog, a duša mu se uza nj puni miron. Za tak'i osičaj ne triba vela pamet. Triba jemat samo o'kjučano srce.
    Piše da u čoviku triba pripoznat Boga. Da je to oni  malešni obični čovik.
    Božji posal ovod na zemji ne će bit gotov do za'njega.

 

 

    Stisla se nevoja. Zlo 'ara zemjon. Triba li Bogu naša pomoć? More li On sve sâm prispit, oli…?
    Zavela nas pusta pamet, išempjala, zagingala nas u zvizde i znake. Ondac nas On vrati natrag, na početak, da nan sinjal da smo pogrišili i da gremo krivin puten. Ti sinjali znadu mlogo bolit.
    Mislin ča bi tribalo napravit da čovik bude pinku drugovačiji, da se ferma na vrime, da ne falije, da ne reče ča ne triba, da se ne miša u sve, da ne sudi, da reče koju lipu, lipo svituje i da se nad nikin ne izdiže.
    Triba li najprin ostarit, da bi 'progleda'?
    Koliko bi bija ciniji ovi život kad bi mogli prominit dilove ča i' je čapala ruzina, zarad česa se misal fermaje i kvari, zarad česa joko sve manje vidi drugega, najskoli bližjeg i njegove potribe. To bi triba bit posal bokun starije čejadi, koja jema još pinku vrimena i more reć koju. A jema ča reć.
    Ma mlogo nas je izgub'jeni.
    Ferman se nikidan s jednon staron meštrovicon. Ona je morala prispit u Dom, jerbo višje ne vidi, a jema mlogo godišć. Na to se dugo spremala. Ni jon bilo lako. Ma, morala je.
Ona već misli ić natrag kući. ča je? ča se dogodilo, u ovako lipon malon mistu?  ča jon fali?
    Ni zadovojna sa stanarin. Ni našla njanci jednu ženskicu s kojon bi mogla pripovidat. Svi oni ništa ne radidu. Samo ležidu i jidu, govori ona. Ništa i' ne zanima, najskoli ne ono ča jin ona govori. Oni bidni ne razumidu ča in' ona oće reć. Nikor se ne fermaje s njon. Nikor ne će dilit kamaru s njon. Asti miša u bumbaku. Kako to? Zašto?
    Je li ko prosuja kakvu čakulu? Nije. Ma kakvi! Nastali su problemi i sad i' vaja nać u domu, meju judin. To ni pravi put.
    U Domu se skupija svit iz Zagore i s otoka. Malo je onde svita sa skulon. Ma oni jemaju skulu o' života. Ti je svit teško živija i u svoje vrime je bija vridan, jema svoju fameju, dicu. Kad su otežali, ostarili i kad višje nisu mogli živit sami, srića i Bog, da su se jemali di sklonit. Sklonili su se tot u Dom.
    Meštrovica moli Boga, ma ne more to s njiman zajedno, jerbo oni molidu nikako 'čudno', - Ma, oni ni ne znaju ča molidu. Svaka moli na svoj način. Bože sačuvaj nereda! Tribalo bi in' rastumačit i nika evanđe'ja, koja ni popi s o'tara ritko znadu protumačit kako triba. Na ten triba radit… Ma, oni su lini i ne ćedu ništa. -
    Pinku san se nasmijala i rekla da su nas najprin meštrovice jurišale po školan a sad kad smo ostarili da će nas jopet, more bit, tokat učit i u Domu, da nikor ne će proć godinu, a ako se čagod popravimo da će nan uvest i maturu. Gospe moja!
    Triba reć još koju. Tu stoji joščec je'na meštrovica. Ovi iz Doma su mislili da će to bit lipi kombinacjun, stavit i' u istu kamaru. Ma ova ča je prin arivala, rekla je da ne bi nikako ostavila dobru malu staričicu s kojon je u kamari, da jon je lipo s njon, da one jedna drugon pomognu ča triba, pročakulaju zaje'no i da žividu  u miru.
    Pripovidala je s novon meštrovicon i ne bi nikako otila bit s njon. - Ona grubo govori. Ponižava ovi bidni svit. Nikor jon ne vaja. Najskoli bi otila, da nas dvi nji' poučavamo i štivamo u red, da dajemo ka nike tečaje… U ime Isusovo, nisan ja došla nikoga mučit ovod. Nikor se ovde ni doša prominit. Ovde se moremo odmorit, Boga molit, čagod proštit, pogledat televiziju, doć na misu i nima druge. Ja san zadovojna i ne triba mi ništa višje o' tega. Triba mi samo mir.-
    Eto na, svitu moj! ča vi kažete? U čen je teškoća?
    Vidite li vi da se ni lako prominit, da je velikon teško postat malešan, ponizan, bit s običnin sviton koji nima vele skule i razumit ga.
    Kako je teško u starosti kad se čovik ne more skalat s visine?
    I ten 'velikon' čoviku triba pomoć, vela pomoć.
   To je najteži posal, kojeg je najprin tribala napravit fameja. Ako ona ni položila ti ispit, teško će ga položit i ova vela, smišna i dobročudna domska fameja.
    Ajmo te trude pripustit Božjon providenci. Ajmo jednu molitvicu za velike, da in Bog pruži svoju ruku i pomogne jin skalat se barenko bokun nižje!