1.

Ća je bilo, je li se čagod dogodilo? Je, jopet me vozija niki mladi finčukasti taxist. Još dite. Lipo pripovida. Kad smo arivali, omar je iskočija, otvorija mi vrata, pridrža ruksak i šćape, i da mi ruku, da lakše izajden. Ma jopet nima računa. Pari mi se ka da su se dobro dogovorili, pa i oni jemadu nikoga ko i je razumija. Bidan oni ća je jedini napisa račun, ne ću ga višje spominjat. Da znaju dobro bi ga nabubetali. On će njiman pravit nered, ma nemoj!?

2.

Ondac san se malo kontraštala s malon radi jednega mejla u kojen nan pokažijedu koji su sinjali, znaci, simboli ne-kršćanski, okultni. I ja i poslala daje, a ona mi ka iz topa, da koja mi to neuka osoba šaje i ća štijen sve ća ariva u poštu. Pa to je za me, na moj indiric. Ko će to štit, ako ne ja. I još dometne, koliko je ti mejl sad napravija šćete u svitu?! Majko moja! Ća je ovo, ništa ne razumin.

Ma, stvari ne stojidu baš tako. Lipo je to pogledat i vidit ća to svit jema o ti znakov i sinjali, ća će in to i kome služidu. Ko i je to začara?

Ma mejl je ariva o dobro učene osobe i svita oko nje. I omar mi prvi dan pomoga. I još kako! Vidin u foje, ka niki iz naše vlasti, kako se beli, beči, kako to već svit zove. Ma kako se jazik sporo razvija i brzo zatire, mi smo ostavili to reć, da se čovik beli – plazi jazik. Ka ono, ća mi moreš...oliti, govori ti moj, na isto ti dojde... ne moreš mi ništa EU!

To obično gre uz dičinje igre i male ratove, kad jedni drugiman ne moredu ništa, kad su potrošili sva oružja, onda se belidu, a niki i petavaju roge.

Ma, kako sad štijen, to ka gre u simbole i nike grube znake, pa po nikima moremo otkrit di taki čovik pripada, kome služi, napr. sotonistima, masonima i drugin vražjin društviman, a ća more bit gore o tega. A sve to nekako sakriveno, ka na kukalo.

Prilog: Znakovi, simboli (PDF)

3.

Nima se ća pratit, sve prez početka i kraja, svaki govori iz svoje škatule, priti, briga njega za svit. Omar sam se sitila da je siguro s nikim od force u vezi, da more činit ća ga je voja, pa i belit se, ne samo nan, vengo i EU. Uvik san mislila da ne more čovik toliko bit zločest, a da ga nikor ne podupire i to ne bilo ko. A ondac spominjedu Ingleže. Blago nan. I govoridu, da bi ti ća se belidu, a jema i ženskinja meju njiman, sutra zasili u briselske urede, dovukli fameje i komodali se, a ti se moj narode zabavi s njiovim plodovin, ne o mora, vengo o rada. Još kad izajde oni medo iz prežuna, bit će to prava fešta Cosa nostra d.o.o.

Mislin i ni mi drago, da mi je na kraju svi krajeva ostalo samo ruganje. Noticije koje su važne za svit ne smidu priko medija, ne to ne, jerbo se onda vidi ća on radi i govori. To zovedu transparentnost. Koja rič?! Sram i bilo sve, i one ća ga slušadu i mučidu. Triba in reć besidu, triba i maknit prin nego svit ostane prez penšjuni i plaća. To ti je ka politika unutra, da je nikor ne vidi, oću reć: unutarnja politika. Mene ni straj, ma mi je žaj koliko ovo živin i koliko ovo Tita jema i nima mu kraja, jašu klonirani na čelu kolone. Ma nima višje mavanja s bandirican ni trorogih kapa, njanci crljenih marama.

Slušan o jednoj jedinoj vlasti na svitu, gledan joko na vrju piramide na dolaru. Govoridu da je to joko o sotone. Pa kad svit poludi na pineze, kad prez nji ne more ništa, kad zaboravi na sirotinju – sve je zaboravija. Taki višje i nisu judi, moremo in vadit organe iz tila i prodavat i, moremo svašta, moremo in oprat možđane iznutra, izglancat i ka kartu. Onda moremo sve: moremo naselit njiove otoke, zemju, prosut po njoj GMO, moremo lagat bez straja, jerbo oni i tako višje ne znadu ća je - ća nije. Vela mišadura.

Jopet nered za dišpet, jer tako najboje gre. Ondac ako ostanemo nerazvijeni, jerbo smo sve dali i prodali, nikor će nas morat prigrlit, a ko će to onako ladno napravit boje o Ingleži. A mi in pokažijemo, kako i volimo, pa na sve butige stavjamo imena na njiovom jaziku i tako ne znamo ća ćemo sa svojin. Povist moramo drugovačije nazvat, prominit joj ime i zapametit, jer će nan je pojist ka tarme robu u armerunu.

Ostat ćemo ka patujci, ma oni su makar jemali svoju Snjegulicu, a nan je osta Moro višćun koji se beli i u bronzin sa stranin i stranačkin otrovon spušća jabuke i neražentane nan vraća i servira ka novi rvacki proizvod – izvorno rvacki.

Ajmo ća!

Split, 23.9.2013.