Nedija je. Upeka je zvizdan. Po Gundulićevon mo'š odit ka po Pjaci. Nima te ko ni satrat.
I u crikvi nas je manje. Lito je. Svit je iša kući. Ka da se i jazik raselija. Na ulici slušan nike tujinske riči.
Na školan su zatvorene ponistre. Ne čuje se balun. Nima ni dice.
Samo je u cablin osta šušur. Cvrčci cvrče.
Na tleju, raskidani foj iz libra. To je sinjal da višje nima škole i da su naša dičica sve lipo spremila.
Ma, isto je pinku drugovačije kad ji nima. Ka da su sa sebon odnili i dil moje force, a to oće reć i bokun zdravja.
ča je ostalo?
Ja sebi nisan nikor.
Vrime trče.
Pitan je ča je od onega Dida ča je osta čuvat kuću dok se njegovi ne vratidu iz vikendice.
Doša je sin dogovorit plaću za pomoć koju će Did dobivat. Počeja se nagađat. Zna on da nima tu ni višje ni nižje, pa sve izventaje i miri triba li Didu morebit pinku manja briga i ašištenca, oli, morebit, samo obid… Dvi ijade je mlogo dat za Dida. Oštja! ča ću? Kako ću?
Od te je vele fameje doputovala jedna neputa. čula je Didine jade i obećala ga odvest u Zagoru, u njegovo rojeno misto. Tamo jema još živi' koji ga poznajedu. Ima i di stat. Ko će mu pomagat, čuvat ga? Morebit da će ga nikor i privatit za penšjun?
Ma, dogodila se vele smišna stvar, da sve triba pitat sina komu je Did težak, komu smeta, koji ne zna ča bi i di bi s njin. On će odlučit.
ča će pritegnit na tezuji: Didin penšjun oli Didina žeja?
Niki dan se Did rasplaka i žalija se na nevistu da grubo postupa s njin. Odredila mu je čašu, pjat, žlicu, nož i perun. Ništa drugo ne smi taknit. More pinku stat na nogan ma nidir se ne smi naslonit, ništa čapat, a sidit smi samo na katrigi, koja je za nj određena. S njin nikor ne govori.
Nevista je bisna. Uvik mu botunaje da jon je pokvarija ćer, naučija je Boga molit i da gre u crikvu. To mu ne more oprostit.
Inšoma, Did bi se spasija da mu je izać iz ove buže. Ma, ne more nikor ništa dok se sin ne vrati. Tako ti je to, Dide moj, vaja čekat sinovu za'nju.
Zato se švogaj, dok nima nikoga. Šapji i čakulaj sa ženskican, ča te ašište i rane, dok te jema ko slušat. Morebit da ćedu bit boji kad se vratidu iz turizma? Morebit da će višje pinez učinit divertimenat i da će to pinku napuvat jubav koja je ižvampila?
Nova sestrica ne more o' čuda. ča je ovo? Di god dojden, ka da se fameja pokarala, rastavila. U jednon se piše teštamenat, pa su svi zabili nos u pod, ako ko reče koju, omar svi skočidu.
U drugoj se fameji pokarala dica. Sin koji je prvi ariva skupija je čačin potpis i napravija ča mu je tribalo. Kad je triba platit račun, reka je da čača jema i da on ne triba ništa nadodavat. A kuća, stan, dućan, zemja…, a ča ćemo poć govorit? Sve je to čača ostavija.
Kad je čača sta slabo i kad je parilo je da je ultimo, doputovala su dica. Prvi je ariva ovi sin i umisto da je najprin doša vidit i pozdravit čaču, on je omar iša na grobje platit sprovod. Onde su mu se čudili i rekli: - ča bi vi otili platit, kad mi nimamo notano da van je čača umra? ča van je? Falili ste. Vidite da ga nima!? -
Je, na grobju jemaju prav. čača je još živ.
Živ je i dûg za obid i pomoć koju čača prima. Sin po susidin javja da čača more sam platit. Ne odazivje se i nigdi ga nima. Sakrija se.
On će jopet na grobje, kad čača zapravo parti.
ča je ovo, svitu moj?
Jučer pridvečer, bižin od omarine. Na po puta, ugledan njezinu bicikletu. A, ha, evo je! Uvatila san je! Uzmen mobitel, nazoven je i rečen: - Evo me, šoto ponistre! - Ona se omar javi i da mi mot da se popnen. Ušla san u jedan veli tinel, pa kroz dugi odnik do kraja, u jednu velu spavaću kamaru. Kraj ponistre, do male starovinske psihe sa zrcalom i vazan punin cvića, ruža i ljiljana, vidin, sidi mršava staričica, uredno ošišana s rečinan na ušin, kolajnon, u tri reda, oko vrata i prstenin na rukan, kojin prid sebon drži odalicu. U sredini je stolić sa slakusarijama i sokovin.
Došla je i ženskica, kojon je starica kuma. Tu je i Mara, koja staricu ašišti višje od pet godin. S njon je po cili dan, uvik. Virna jon je i poslušna. Starica je to i nagradila. Kad ona umre, stan ostaje Mari. Sve je to zapisano i napravjeno kako Bog zapovida.
ča smo tote nas dvi došle? Vidin da je nika mala fešta? Tako je. Starica slavi osandesetitreći rođendan. Na zidu je Gospina slika i mala slika njezina pokojnega muža. Ništa višje. Muž je umra. Nisu imali dice. Kad je došla bolešćina vratili su se iz Amerike. Sad je tote. Sama.
Zapivali smo
Kad si negdje sama u dalekon svitu… iz Male Floramye, zaželili jon još lipi dan s njezinon Maron, koja nas je litratala i potlen smo išle daje.
Danas smo dobile SMS poruku: - Drage moje, još jednon puno hvala što ste meni učinili čast a mojoj mezimici veselje vašim prisustvom. -
Svitu moj! Kad triba pomoć u većin i težjin poslin, dojdu i Marina dica, koja od matere učidu radit i služit. Tu školu dica ne će nikad zaudobit.
Daj Bože višje mijenic i u našin famejan, a dobru Maru čuvaj i blagoslovi jon njezine trude!