Bože moj! U ča smo se pritvorili? Ka da smo izgubili busulu. Joli ti šušur toliko upadan, jerbo su se to'ko približila dva dvajspeta u misecu: izbori za tri dana, 25., i Božić za misec dan'? Ne znan?
Split je jopet malešan. Sve se događa na dva tri mista. Svi su izašli vanka. Reka bi čovik: sad se vidi, sad se zna: ko smo i kakvi smo.
Najprin su se s metlan lipili plakati, penjali i' ko će višje, drugi i' odlipivali u sri' bila dana. Je'ni s Bogon čuvali Rvacku, drugi pjucali po onin koji su je stvorili. Je'ni su pekli srdele s bilin očin a drugi dilili sadnice o maslin'.
Di si god okrenija, nabasa si na na jude s maslinan. Je'na je ženskica izvadila dite iz karocete i u nju štivala tri sadnice. Svi trčidu ka da su i' ukreli. Jema i oni, pinku stariji s bonetima i rukan odozad, ča čekaju di će čagod zavonjat, a ondac navalidu. Guraju se ka igrači regbija oko baluna, ko će kome vazest zalogaj.
Izašla san deboto uru i višje prin početka da obajden, ošervan se i čujen koju, a ondac san se vratila kući.
Inšoma, unutra šatora je svit koji je ka za stranku, a vanka tega, sa strane, stojidu oni ča znaju fiščat i pravit makakade, a jopet bi unišli unutra i mašili se, kad bi vidili da dilidu debrecinke i pivu.
Ne znan ča činidu kad u isti dan triba trkat na višje skupov' i di sve to štivaju. Ma, ne ću o ten. Lipo je to ispripovidija naš šjor Ivica je'ne subote na Radio Splitu.
Još je fala Bogu živ jedan stari komunist (e, da je jedan!), ča govori da nije višje to, a ne znan, ča je. On je zna reć da bi bilo dobro povrj trbuja jemat patent, pa kad je čoviku tisno, otvorit ga i malo promišat, razmrsit criva, a ne završit pod temperin.
Pomislila san da bi bilo dobro pozan svega tega ča se podililo, pojilo i popilo, popit po čaše gorke soli i navrime se osvistit.
Ako čovik nima vo'je ni force oli ga je straj osvistit se, triba se fermat kraj najmanjeg izmiš'jenog pulta kraj kojeg su stale dvi divojke s nikoliko libri. Tu ni bilo spize ni bibite. Piše: - Dani filozofije. -
Ajme meni! ča dištonaju okoliš.
Kako se mudrost mogla fermat ovod? Niki će mislit da su i oni more bit nika stranka.
***
Inšoma još ovi nikoliko uri, oni mislidu da moredu govorit ča i' je vo'ja, vriđat se meju sebon a mi in moramo sve virovat. Ondac kad svrši ovi vrtu'jak, kad jopet počnedu govorit ka i prin izbori, kažedu da je tak'i običaj. Jopet su svi ka prijate'ji i svi se dobro razumidu, ako ćemo lagat.
Najšporkije je ča se većina tega svita ponaša ka da ustav vridi samo za nji', da samo oni jemadu pravo na slobodu misli, govora i pisanja. Zaradi tega još prin tega šporkaju svakoga ko ne misli ka oni, ko nije njijov, ko jema svoje miš'jenje. Crikvi bi najrađe zaklopili vrata, udunili sve tiskovine, izbacili i' iz skula, svi' spustili jopet u katakombe.
ča je još šporkije, vratili su se jopet špije u crikve i dežuraju. Meni se pari da je to 1945. joli 1956. godina. U ono vrime, sićan se prijate'jice iz gimnazije, posli profešurice, koja je dežurala je'ne godine na ponoćku isprid crikve Gospe o' Zdrav'ja i notala ko uliza unutra. Poslin mlogo godin', pokazala mi je je'na druga prijate'jica na nju i kaže da jon je sin nastraga radi nje. Ondac je prošlo još višje godišć, pa san je jedan dan našla u sakristiji jedne crikve. Nisan znala ča radi onde. Ma, vidila san da sve pozna, da je ka domaća. Bože pomozi! Jema i tega. I bit će jopet.
U mojoj župi, na misi, pop nije govorija o strankan niti za koga triba glasovat, ali je lipo reka da proštijemo priporuku rvacki biskup' za izbore, koju ćemo dobit na izlazu iz crikve a ne priporuku biskup' s kojon su nas tratali u fojin. Na kraju je zamolija špiju koji se, po službenoj dužnosti, nalazi na misi, da nastavi pisati o njemu, ali samo ono ča čuje da je reka, a ne izventavat i nadožuntavat. Reka mu je da ćemo mi molit Boga i za njegovo zdrav'je unatoč njegovon zločeston poslu.
Isti dan, na misi, u 8 uri, u Gospe o' Zdrav'ja, svećenik je priporučija virnicin da se pridržavadu priporuka rvacki' biskupa i da svi izajdu na izbore.
U ti je čas je'na ženskica puno grubo, šoto voće, zabeštimala i izašla vanka.
ča je ovo, svitu moj? Ma, nisu ovi ulizli za'nja dva dana u crikvu. Nisu se ovi zdigli ni o' mrtvi. Pari mi se da ovo stupaju njijova dica, unučad, da jopet vežijedu krvave marame oko vrata.
Još manje o' četri ure, pa će, Bogu fala, svi umuknit.
More bit da je i dobro, s vrimena na vrime, prosijat se, da vidimo di smo, koliko smo blizu oliti daleko od onega ča sanjamo, jerbo bi nan se moglo dogodit da višje ni u snu ne ćemo smit govorit.