1.
Jutro, ranije vengo obično, konobari tek pripravjadu stole, stavjadu kušine na katrige. Get, svaki metar kafić, svaki u svoje vrime prez slobodnega mista - mista o puntamenta. Ni čovika da sritneš. U prolazu Gospe i ja sami. I vično svitlo. Iz Sv. Martina čuje se šoto voće dominikanki: Oče naš...
Sv. Martin u Getu
2.
A kad je doša na red moj espresso, u mojoj su carskoj kavani počeli diškorši iz foja. Probija dvadesetogodišnjak dvadesetdvagodišnjaka nožen i likari ga nisu uspili spasit. Umra je na dan sestrinega vinčanja. Ubojica, mlaji o njega oduzeja mu život jerbo mu je bija dužan. Gospe moja! Ća ovi svit misli, ća in je u glavan? Nisu još njanci proodali a već imaju pinez, oklen, di su ga zaradili? Kako? Koji je to posal ako ni vražji. Vanka izlazit s nožen? Ća je ovo došlo?!
3.
Jema li čagod dobrega? Jema, fala Bogu! Piše Dalmacija o Postiraninu Bezmalinoviću, ća je poviše mista izgradija tvornicu, koja će u svit sve do Japana, slat prerađenu ribu, štivanu u škatule na kojiman će pisat Adriatic Queen. 40 mijuni konzervi na godinu. Ma triba reć, nastavja Dalmacija, da je to izgradija Lavčević. Da objekt pari, ka da je pa iz neba, oće reć, ka čudo. Ajme! Okad nisan čula za ovo poduzeće. Ka, sve je nestalo, pritvaralo se u svašta, a kad si otvorija oči višje nisi ništa vidija. Ma, izgradija je i lipi restoran za radnike, a dovest će i novega svita, perfin iz Splita. Uputile se Postire i ne će i nikor fermat. Pa neka dojde Bruxelles, nek vidi ća Bračanin more. Osta ćedu zavrteć.
Eto na, nima višje male Sardine koja je tolike pomogla, naranila i spasila. Srušit će je, a na njezino misto izrest će otel.
Ono, ća mi je u svemu oven najdražje je, da Sardina oliti Adriatic Queen ostaje u Postiran na Braču, a onda s njon i Bračani. Nisu mi mrski ni ovde u Splitu, ma jema li ća lipšega nego kad čovik more ostat u svom mistu, na svojemu škoju. I dica i njiove dice, dica. Eto, pinku dobrega. Tega nan fali!
Petar Jakšić - Ribe, hotel Pastura, Postira
4.
Ne sićan se na kojoj TV, ali će se sitit oni, ako in ko reče, da su proštili ovi par riči. Dunkve, na toj TV, dva divjaka sidu za stolon, pred njiman foji, mikrofon i oni navalili revat, znate fala Bogu ća to oće reč. Nimaju sluha, ali udri ko će jače i ferman se čut o čemu je rič. Kad, njih dvojica pjucadu, vriđadu, izrugijedu se Svetoj Stolici i Vaticanu, tako šporko i zločesto kako nikad nisan čula. Ma ni to bilo ni vicasto, ni za nasmijat se, ma je bilo za dobro se zamislit i pitat se, je li ti judi za to dobivadu plaću, ko in to daje, ko naručije takve šporkarije, nasjkoli ko to piše. Pa ća oni mislidu, da će svit mučat, da in nikor ne će prilipit trisku u nikon blogu, na nikom webu. Kad se jednega dana promini ovi pakal, oni će se žalit da ne mogu višje radit slobodno ka ća su radili. Ma nemoj. Je li to sloboda? Je li to kultura? Je l' ti to naobrazba? Srami se televizijo čija jesi da jesi. Jesu li to tvoji dosezi, vridnosti? Plaćenici za ovi svit nisu nepoznanica, ali da se dogodi takvi ološ na TV, grij je i previd cilega medijskega svita.
Pakao
5.
TV govori da je u Dubrovnik arivalo pet velikih kruzera, 16 ijad gostiju a u jednen je bilo 2.400 homoseksualaca. Čovik na čoviku, guradu se. - Je, jema nas puno, ali lip je grad, volimo dolazit ovod - govoridu gosti. A oni, ća nan sve ovo pripovida, govori, da su oni, to oće reć homoseksualci, dobre mušterije i gosti, da dobre pineze ostavjadu. Pa ća sad triba o temu? Oli ni bilo dovojno reć da je došlo 16 ijada svita i gotovo. Ma ne, triba to naglasit, da ko ne bi, Bože prosti, zaboravija da i nji jema. Ća i triba reklamirat? To mi se pari, ka da je reka, a u jednen kruzeru je bilo 2.400 livorukega svita. Sve sami livaci.
Kruzer Celebrity
6.
Ne' š ti noticije, da je milijun graštapani pobiglo iz Kine, ma da nisu opasni jerbo se koristidu u tradicionalnoj kineskoj medicini. Vidili graštapani da se mogu reklamirat ka i nilski komarci, da je svit prez granica da ćemo na kraju svi bit jedan veli region i tili se komodat.
Nilski komarac Kineski graštapan
Ali ne, sad se pripala naša Vlada i vidila da se pinku zaletila i višje ne će region. Ostat će takva – kakva je, conkulasta i furbasta. Samo da opstane! Prez nilskih komarac i kineskih graštapani. Jemamo i mi za bacat, nismo sirotinja! Aj ća!
|
