On sve vidi, čuje. Zna di smo, ča nas tišća, straši, u ča smo infišani. Sluša ča govorimo i gleda kako činimo fintu da nan ni ništa. ćiri nas dok šoto banka štivajemo ča nas boli i ča ne bi otili da drugi vididu, njanci nan u jočiman. Drugovačiji smo. Jedan oće sve špjegat. Pravi se junak. Drugi umukne. Oči mu iskočidu o' straja. Nima ga za vidit ni za čut. Vas uđe u se. Ma, kad za sebon zatvorimo vrata o' kamare, pari mi se da smo jopet svi isti. Oni, s dubokon viron, zapasani, zafalijedu Bogu ča i' je pinku približija, ča i' voli na taki način i vodi križen i mukon prema vičnosti. Propjo san đeložasta na njizi i korin se ča u ten niman višje force, ča nima dubje vire u meni, ča uvik nidir izmiče. Biži ka da se more sakrit oli uteć. Po grobju se, ka botuni, žutidu i bilidu prve krizanteme. Prolazidu judi s karjolan. Popravjadu grebe, posipju žalo, čupaju izreslu travicu. Niki bilidu slova, luštraju ploče. Žene s metlan, metlican i sićin vode metedu i peredu greb i okolo njega. Niki pinku težje najdu greb. Niki ga ne najdu. Nikin je ovod lipje i šesnije vengo in je prin bilo. Najprin je sviman lipje, jer su kod Boga i ne muči i' višje nikakva zemajska mora. Niki dan je umra jedan dobri čovik. Bija je mlogo betežan i napatija se. Ni jema sriću. Dokraja je živija, ajmo reć boenski. Ka da je bija sam. Reka bi da su ga svi zaudobili. Tamo na grobju zatrubila mu je trumbeta i zapivali stari prijate'ji. Volija je pismu. Pisma ga je jur ispratila. Nisu ga zaudobili. Pivačko in srce ni ga moglo podnit vidit takeg, prez riči pridana. Susritnen jednega, koji samo ča ne plače, jer ni bija na sprovodu prijateju, koji mu je pomoga kad mu je bilo najtežje… - ča je radija? - pitan ga. Reče da je prin radija a sad je bija prosjak. Doznan da je to jedan od oni ča je prosija s odkrivenon podkojenicon u ranan, koji je skup'ja pineze za 'travu'. Nije mu iša na sprovod jerbo se plašija narkomana, koji su bili na sprovodu. Plašija se, jerbo već deset godin ne uzimje drogu. Plašija i' se, da će ga imbrojat i zatuć. Svi smo ovod pomišani. Nima 'našeg' reda. Ma o' tega mista, red višje ne činimo mi i nije red ono ča mi zovemo da je vengo Božji red, s kojin se, more bit koji put i ne mirimo. Fala Ti da jema misto di ne moremo višje ništa, di pada svaka forca i svaka priporuka joli veza ostane prid Tvojin vratin. I ako tako živiš i viruješ, ne mo'š vengo čapat križ i nosit ga, bit sritan ča te se Bog sitija. Zašto svit ne će da čuje besidu o bo'jetici, o nevoji, siromajin, smrti, grobju? Zarad česa nisu te beside jednake ka i sve druge? Okrićemo glavu o' njizi. Meni se pari da bi bilo boje sitit se njizi, ne da nas strašidu vengo da nan stojidu prid jočin. Nek nas sitidu da smo ovod samo na prolazu, nikor dužje nikor kraće, ma svi ćemo partit. Na zemji nima mlogo 'našeg' reda, pa partijedu mlaji ka i stari. Zašto ondac za ti put čovik ne bi bija pripravan? Koji put nikor zna reć da je Bog vazeja pogrišnog čovika, da je triba vazest drugega, niku 'nesriću', 'nevoju'… Jopet ulazimo u Božji red, ma On nas ne obadaje. Ne moremo sve znat, razumit. I ja san ka je'na karjola na Lovrincu, na kojen se osićan ka meju prijatejin, di nalazin slomjeni križ od siromašice čiči i Marije iz Jezera. Ondac pozdravjan vicastu Branku i palin in' sviće, virujuć da ćemo se jednon svi ponovno nać i pripoznat, da će to jopet bit velika siromaška ma vesela klapa drageg stareg svita, koja je, neimašćinon i jubavju, zavridila raj nebeski.
Split,19. listopada 2007. god.
|