Kad stojiš kući pari ti se da svi stojidu kući, najskoli po oven zvizdanu. Ma ni tako.
Evo me, rekli bi naši, na zanjen mulu, di čekan, rekli bi parobrod, ma ni ni tako, vengo trajekt!
Zvizdan je upeka. Sestra mi govori da je tišća uprsi, da nima arje, da višje ne more izdurat vanka, a tek je počelo.
Inšoma, ja se pravin zdrava ka cekin, pa san već najranije jemala puntamenat sa gospojon Divnon iz MUP-a ča san je ono bila utirala u libar Dodir vrimena jerbo me bila osvojila
krejancon. Baš se dobro zove, propjo je divna i čovik ne more zamislit da jema i tako dobrega svita meju nan. Duša o' čovika!
Svi govoridu da ne izlazin bez kapelina jerbo će me ubit sunce. Jemadu prav. Šoto strijača je pinku lagnje. Jučer mi je Mala rekla da se unutrašnja štrika o' strijača rašila pa nek' je sitin na to, kad dojdemo doma. Ona će to zašit. Ne' š ti, pa ću to zapametit?
Ma, kad san arivala na puntamenat isprid MUP-a, skinen strijač s glave i vidin, da se po štrike
o'šilo. Potegnen konac do kraja i u ruci mi se najde cila štrika. Lipo je naslonin na sidalicu, a strijač na glavu. Ali, sad se strijač, pinku širi, spustija na uši i klapa po nogican od očali. Aj' ča! Nima višje strijača. Isto mi ga je bilo žaj itnit. Donila san ga kući i obisila ga ka dekoracjun na caklo o' biblioteke.
Sitin se i najden jednu žmarivenu kapu, stavin je na glavu i jušto! Je, da se sad i glava pinku smanjila, pa i kapa lipje stoji.
I tako, kad cili svit miruje i čuva glavu, ja moran vanka. Moran, ne mo' š priskočit ovu sriću.
ča je?
Iz Brača se vraća Kate sa svojin đacin i omar nastavjadu put za malo selo Samaricu, u Moslavini. Jemadu i svoj bus o' čazmatransa.
Pa šta? Ne' š ti noticje? Svi putujedu: jedni gori, drugi doli i ča jema u ten?
E, pusti ti to, ma ovo je isto, pinku drugovačije.
Kate za me nikako ne more bit ka i drugi svit. Zašto?
Zato jerbo je Kate osoba iz škatule.
Iz koje škatule?
Bome iz PC, iz računala, iz kompjutera. Kako o' š.
Dunkve, Kate i ja smo se upoznale priko katoličke internetske stranice koja se zove Katolici na internetu.
Ja san jon ponudila neka izabere ča god oće o' moji naslova, pa nek stavja na Katolike…
Ondac je Kate arivala na moju web stranicu i tako je počelo naše prijate'jstvo. Ona je uređivala Duhovnost i tamo je štivavala moje naslove. Eto, tako san i ja upala tôt. Jema o' tega višje o' godine.
Kad je Kate ositila da i s druge bande jema bokun duše, jedan mi je dan poslala svoju lipu priču: Srećica. Kad san je proštila, vidila san, da je lipo jemat Katu za prijate'jicu.
Ne ću pripovidat ča ona joščec radi osin ča radi u skuli s dicon. Ko oće nek gre na njezin blog koji se zove Skolastika, pa nek vidi ča sve Kate zna, ča je veseli, ča misli o monaštvu, kako sanja o trapistima u Rvackoj i kako more bit to ne će uvik bit sam san… Prispila je Kate završit i Dopisnu teologiju.
Malo selo Samarica o' dvista svita je privatilo Katu rašireni ruk'. Ka svoju, a ona mu jubav uzvraća stostruko.
Kad su, prin pet dan išli na Brač, fermali su se, nikoliko uri i u Splitu. Bija je to veliki događaj. Našli smo se, vidili joči u joči, izjubili i upoznali, izminili darove… Arivala je i Letizia s Katineg bloga koja mi je upala u joči jerbo lipo misli i piše. A ondac je u za'nji čas prispilo i Boga'stvo siromašnih, koja ni osoba iz škatule, ma je ja svaki čas utirajem u nju i tako pokažijen svitu ča je prava jubav i kako se očituje. Je lipo za proštit, ma je pinku težje razumit i svidočit.
Jošćec je u to doba zazunzija Kati i mobitel, pa se javija i pozdravija nas jedan dobri čovik. Parilo je, ka da smo arivali na šedutu o' andjeli. Svi iz škatule.
Kad smo meju sebon razminili darove prijate'jstva i jubavi, Kate nas je naoružala vezanin stranican puni' prelipi' litrata i riči o svojon Samarici i sviman dala po jednu domaću samaričku salamu. Omar smo očutili vonj samaričkeg dima, blizinu šume, Božje prirode, a najskoli tišine koja krasi to malo Katino selo.
čekan Katu sideć na kamenoj klupi. Na za'njen mulu.
O' sunca mi zvizdice svitlidu prid jočin.
Za prispit ovod jema za odit. Ka da greš na stratište, pa ko prispije.
Do mene sididu je'na starija ženskica, u crno, i muškarac. Ona je skinila s glave frontin, iz ruku je spustila borše i vriće i komodala se.
Mora bit da su iz istega sela. Pričadu o mreni, o operacjunu, o' likarin. Cilo vrime. Dok ja ovo zapišijen, oni se po sto puti vračadu na ošpidal i govoridu ko je boji, ko ne vaja i ne bacilaju zvizdan. Ni lako. ča mogu, to in je pjaca i riva, šeduta. More bit in je to cili divertimenat.
Ko zna jema li tamo koga, je li i' ko čeka, pa triba refat, barenko ovod…
A ondac se vanka đige, omar iza sv'etionika, prin jedanajest i po, ukaza trajekt koji je okrenija prema nan i polako akošta. U prven je redu broda bija autobus čazmatransa. Kate mi je mobitelon dala sinjal da će izać samo načas, da jon pridan ispržene cedeove sa seminara fra Ante Vučkovića, ča san jon obećala, a ondac omar nastav'jadu put i gredu da'je.
Tako je i bilo. Jopet smo se izjubile. Kad je Kate ušla u autobus, dok su prolazili mimo, vozač je trubija, a ruke su Katini' đaka i kolega visoko mavale teti Miri koja je za Katino prijate'jstvo i jubav privalila put po zvizdanu, do zanjega mula, ka o' šale. Zdrava ka cekin!
Jer… jubav sve podnosi!
Ondac smo se svi vratili i ulizli u svoje škatule.
Evo nas jopet ovod, svak u svojon čibi.
Ka pravi grdelini, čekajuć cvrkut da mu cvrkuton omar uzvratimo.
Fala Ti Kate, fala Letizia… !
Dojdi Boga'stvo! Gremo da'je!
Split, 25. lipnja 2008. god
