Proštila san danas na stranici Tebe Boga hvalimo, da je Božjon riči vavik bilo teško doseć čovika, jerbo je Njegova rič uvik ništo iščala o' njega. Ni to Božja nemoć, ne će se On radi tega najidit i kaštigat čovika. Samo će mu bit žaj ča Ga čovik ni 'na vrime' obadava.
    čoviku je bila dražja njegova sloboda. Za nj nima ništa lipje vengo kad sam ušesni svoj život i gušte. On najboje zna ča mu fali i ča mu triba, ča oće. ča će mu Bog za to? U fameji? Školi? Na poslu? U marketin? Meju prijatejin, u kafi i betulan?
    čovik zna kontat ča i za koliko mu vrimena triba. I to po godinu dan unaprid. Ni to šala, ni mala stvar. To triba znat.
    čovik je vazeja život u svoje ruke ka par postoli i gre prez štacije. Ko mu ča more? Jema, zna i more.
    Ma, sačuvaj Bože, da ga čagod uščipne, da se skrivi oli zaklapa koja koščica, punta ga meju prsin. Sve se ferma, okriću se indirici u notešu, tražidu najboji doturi na svitu, ča će ga omar izličit i vratit meju žive.
    Nima ništa o' tega! Nima prave likarije, za nas tak'e, ovod na zem'ji.
    Pravi dotur je gori!

 

 

    Vrime projde ka nevera i dosegne te Božja rič, o kojon si ti nevojnik odlučiva, šuperava je, zatvara  u škafetin za drugi put, sakriva je, tajija. Nisi Ga obadava, ma nisi ga ni potira, vengo si ga ostavija za svaki slučaj, nidir tamo, di ga nikor ne će nać.
    E, moj čovik! Koliko je velih petaka pasalo prez tebe, koliko muke, a ti si, ka s prston u uvo prolazija, ne mareć za ništa.
    Jubav koja te je čekala, puna pacjence, strpjivo se penjala na prste pusti' godišć, sad se uspela do tvoga uva, šapje ti i govori, polako uliza u te.
    Ti se minjaš, ošervaješ se i vidiš da te judi ne pripoznajedu. Govoriš drugovačije, mučiš ka nikad dosad. Stvari koje si prin stavja na prvo misto višje ne obadaješ.
    Jopet kontaš, ma sad vidiš da ti je vrime pobiglo, da si izgubija život, a da se s Njin nisi pravo ni upozna.
    Vratija bi se ti jopet u gušte i zemajske pomasti, ma okad ti je dosega uvo i šapnija, javija ti se, uliza u te, cilega te izminija i zamanta, ti višje ništa ne moreš prez Njega. Inamora si se u Nj.
    Sad Ga slušaš, greš za Njin. Primaš Ga u vižite, upozna si Ga s  famejon, prijatejin… Greš s Njin i na nika druga mista. Pokaza ti je di te čeka cilo ovo vrime a ti si se pravija ka da nisi zna.
    Jopet si ka malo dite. 'Očistija' si se. Prispija si na vrime. On te vazeja i meknija na škinu.     Vas sritan vratija te meju oni' devedesetdevet.
    Ti povirova.