Ma
ajde, recite, ko se ne bi najidija, ko ne bi pošempja o bezobrazluka
i jada. Kakvo ponašanje o HVIDRE!!!!!!!! Neka su naši, moji, kad ća
ne vaja - to triba reć.
Oko
podne dva tonobila Doma Lovret, svaki sa četrdesetak gamela uputi se
na sve kantune o grada odnit obid za betežni , stari i nepomični
svit. Tako je bilo i jučer, u nediju (22.6.2014.) Jedan od tonobila
ferma se u Hrvojevoj ulici kraj đardina, ka svaki dan. Na tonobilu
je ime Kuće koja dili obide i za koju svi u Splitu znadu,
registrirana, za ti posal kod Županije Split. dalmatinske, jema i
prometnu dozvolu, ma nikor je ove godine priskočija notat i Hrvojevu
ulicu, u koju se obid uvik nosija.
Eto,
to je grij ove dobre kuće.
Došla
je HVIDRA, vidila da u dozvoli ne piše Hrvojeva ul., ćapala tonobil
i odvela ga na deponij. Judi moji, policija se išempjala, svi
poznajedu naše dobrice i ne moredu zamislit da se HVIDRA tako
ponila. A i njiovima smo pomagali i jopet ćemo, kad bude tribalo.
Oti judi dobili su ove godine na ime svoje voditeljice, nagradu grada i
jošćec nagradu Splitsko - dalmatinske županije, za posal i brigu koju
vodidu o najtežin bolesniciman i ostavjenima po gradu; dvi nagrade moj
čovik, ni to mala stvar. Tribalo je to radit puste godine prez stat, a sad
ih fermaje HVIDRA. Ne vaja i gotovo! Ka zadovojštinu, pridlažen javnu
ispriku. Tako to radi pošten svit.
Ma ni to bija ni obični dan: Najprin je bila nedija, ondac fešta
Antifašista i omar tu do našega tonobila bija je i drugi tonobil,
puno lipji, iz kojega je izaša poteštat i zaprišija prema gradu.
Neka marende! Ma u tem tonobilu osta je sidit šofer. Kad su se naše
dvi sestrice vratile s praznin gamelan i vidile da nima tonobila, ni
njiovi borša, ni mobitela, da su odnili i još teple gamele, ostale
su zavrteć - pošempjale su. Čovik koji je prolazija ustupija in je
mobitel da javidu glavnoj ća in se dogodilo i da in pošaje pineze
da platidu kaznu. Još su uspile vidit leđa poteštata, čiji
tonobil more akoštat di ga voja. Razumin i to, ma ovo ća san rekla,
velika je mača na HVIDRU.
Najidila
san se, ja bi bila omar prema poteštatu, fermala ga i rekla mu, ća
se dogodilo, da nan pomogne. I znan, on bi to učinija. Naše dobrice
je bilo sram. Aj ća! Ondac je ariva i drugi tonobil s gamelan,
donija pineze, platila se kazna i svi su se uputili na svoje
inidirice. A mobiteli su počeli zunzit, svi pitadu di
je obid, di su sestrice, ća se dogodilo...
Ma
jema joščec jedna besida. Sestrica, koja je vozila ovi tonobil
dobila je kartu na 350 kunic, to oće reć, ako falije čagod u
prometu sa svojin tonobilom, omar joj se jema vazest 350 kn. Gospe
moja! A sestrica oko pedeset godin, šerjasta, bez prekršaja, mirna
i dobra. Ma sve! Di smo se našli švogavat Ća je ovo, di živimo?
Ma,
tonobili će i danas u isto vrime i sve druge dane, bit na istom
mistu, (jerbo dobrota nima granice). Ovi nesriknji dan i besdušni
HVIDRIN manevar dobro ćemo zapametit. Zato in ovi put palac doli!
Jema
još. Dan prin ovega, ista sestrica je parkirala u ulici di se
tonobili fermaju na dvi strane i izašla je s gamelon do bolesnika.
Kad se vratila napa je niki čovik i počeja vikati: Svi
ste vi kreteni, ako te vidin još jedan put ovod, gume ću tu
razrizat. Ni teško svitu moj
radit, ma teško je straj trpit od ovakega svita. Dobro piše i mi
virujemo, da je jubav strpjiva
i da sve podnosi . Nima druge,
triba naprid!
U Splitu, 22. - 23.lipnja 2014
|