U Luxora mali stavija mužiku koja baš ni za ovo vrime. Ma nisi u svojoj kamari, pa drž cito.

Izlazidu iz Sv. Duje popepeljani. I ja ću u devet u Sv. Duha.

Ća greš stariji sve boje vidiš da si na putu u pepel. Neka tako bude.

Ovod se i tako sve ruši i jopet će doć na isto, ma nikor od ovi makaka ne pripoznaje pepel. Ovi nikoliko muzuviri oko mene, ka da se tučedu za novinu, je li arivala, priša in doznat ća je novega, je li jopet kogod dobija kantu g..... po glavi.

Kažedu da zanji o krnjevala ni sličija na ništa, da je parilo ka da je sredina korizme. I grubo vrime s kišon, ma i pravo vrime je grubo, puno grubo. Ni svit višje ništa, ni ga voja, umorili su ga – Krnje domaći i Krnje furešti. Nima smija i ne mo' š ga dobit na silu.

Moja Ančica je svojin u posal odnila krafene, ma i u domu su i svi dobili pozan obida, pa i zaposlenici.

S prijatejican je bilo najboje. Tećica brokule, svićica, kobasice, svega po malo i pinku misnega. Dopo, svi će u korizmu, u molitvu, odricanje, prema sirotinji i betežnima. Tako triba!

Kući san čestitala 25 godišća zajedničkega života mojoj Ančici i Zorzu. Lipo i je bilo vidit, darove ća su izminili i bit teta blizu te sriće. Lipa slika masline i tableta, kako zovedu ono čudo za gledat, pisat, čitat. Ma jopet je najlipji znak bija buket cvića. Ća je – da je, Zorzi je uletija u trapulu pa će sad i on, kako bi se nan ruga – kvocat po škatuli. Ondac i ja brojin jena šutnja, dvi šutnje, tri šutnje gori, a doli, kat šoto dvi šutnje. Asti sto miši! Petero nas muči, petero mutavih. Ma znamo mi i reć koju besidu.

Kroz ulicu nisi čuja, ka raniji godin, ciku i viku, dozivanje, smij, pismu... Ma ke!

Reka je pop na pepeljanju, ni triba jemat pinez za bit bogat. Izajdi, ajde u vižite bolesnon prijateju u ošpidal, reci mu lipu besidu, olakšaj mu bol, pomoli se za nj, daj mu ruku da ositi čovika kraj sebe. To je bogatstvo!

Proštila sam lipi libar REBEKA U NUTRINI DUŠE , židovske spisatejice Jasminke Domaš. Libar koji me uvodi i uči nikako drugovačije vidit puste životne križe i trpjenje naroda. Nikor će reć, bilo je i drugi. Je, točno je, jemadu prav, ko tako misli, ma jeman i ja: Svaki je na ten putu drugovačije odgovorija i nadija ime svojoj nevoji.

Zamisli gimnazijalku-židovku, kojoj je dobri otac prin prvega dana skule u koju uliza prvi put, reka: Rebeka, moraš bit najboja! I prvi dan, za vrime odmora, naletija je mladić iz razreda i opalija je tuta forca šakon u škinu i reka: Tvoji su ubili mog Krista.

Ono ća je za me najjače u temu je, da je Rebeka došla kući, zatvorila se u svoju kamaru, vazela ćelo i počela svirat, svirat da zaudobi ća je doživila. Ma o temu ni rekla ni ocu, ni materi, ni noni - njanci rič. Nikad! Ne ću višje o temu, samo znan da u ovu Korizmu sa sebon nosin sve Rebeke svita, pa da i u starosti naučin čagod o njih. Nosin duboki žal za sve ća ni bilo kako triba i žeju da tega višje nikad ne bude, dok u isto vrime osićan da se zlo ne fermaje, da je žvelto i sve grubje.

Ulizamo u Korizmu, a ja se bojin da to ni višje samo Quaresima.

Bogu u ruke!