Da ne gren uvik istin puten, jutros projden kroz mirni dil starega Manuša.
Mučidu smišne kućice zaklopjeni' škura.

 

 

    U đardinima nima višje glinenog patu'jka, ni dice, ni zogatuli po tleju, ni pupe od kaučuka, ni mede, ni baluna krpaša a ni katrigi, na kojin su sidili stari, u 'ladu.
    Pari mi se da odan ise'jenim miston. Oli morebit, ovi novi unutra, žividu drugovačije, prez susis'va i čakul, oli su fameje došle na unjulo.
    Samo su tonobili sinjal da nikor živi u tin kućan. Njanci po koraka uda'jeni jedan o' drugega, zatrpali su pločnike, s jedne i druge bande ulice. More se odit samo po sridini.
    Za menon se došu'ja lipi tonobil. Ni zatrubija. Morebit, da me ne pristraši?! Kad se ferma do mene, razumila san da se moran maknit. čovik se ni jidija, a ja san mu zafalila ča me ni satra i utirala san se nastranu, meju dva tonobila. Jedva.
    Di je nesta ti svit? Oli su svi partili? Morebit u niko drugo vrime o' dana i jema koga? Ne znan.
    U ladu palme, nešpule, smokve, pinku da'je i lipe. Osićan stari vonj. Pari mi se da je isto tako vonjalo i u dvoru švoric', na Lovretu, kad bi  nas dobri šjor Ivan Eterović vodija kod njizi u zabavišće, prin šezdese'dvi godine. Ti me vonji sićaju na vrimena i lipa mista iz ditins'va. Morebit jošćec ovod nikor živi iz onega vrimena? Morebit da su umorni i betežni, a morebit da višje i nimaju ča reć. Najskoli, Bog zna jema li i' ko i čut?
    Tribimo se i pomalo dolazimo na red.
    Nima čovika za vidit. Gren da'je.

   Do mene projde jedan tonobil i na njen proštijen njimačko prezime. Meni je to bilo lipo prezime, jer se tako zvala i moja prijatejica Radana, s kojon san išla u zagrebačku skulu, prin pedes'sedan godišć. Radana za me ni bila obična 'prijate'jica'. Kod Radane san u Zagrebu, na Krijesnicama, prvi put vidila cablo o' jabuke, na padini crvene ribizle, oćutila vonj zem'je i prilipeg đardina. O' sriće san se, ka luda, itala po zem'ji. Kad san se vratila kući, teta mi je rekla da se ne znan ponašat. Ko je vidija da se divojčica tako ponaša!? Ja je nisan obadavala i mislila san da san tako sviman okolo pokazala koliko san sritna. Samo smo dvi godine bile zajedno, Radana i ja, a ondac san se vratila u Split i svak je nastavija svojin puten.
    Prin dvi godine san, na internetu, prigledavala zagrebačke gimnazije. U jednoj san, meju profešurima, intrala na Radanu i njezino njimačko prezime. Bila je profešurica o' ingleškoga jazika. Na portalu san jon našla inidiric. Bilo mi je puno drago vidit da je ostala živit na Krijesnicama.
    Ondac san se malo fermala i napisala jon leteru, u kojon san štivala sva naša lipa sićanja, od prolića do bile zime, svu lipotu Srebrnjaka, Dugega Dola i Krijesnica, di san prvi put po noći gledala kako krijesnice letu i svitlidu. Perfin san dodala i litrat iz 1950., di smo se u školi slikali s meštrovicon Anicon. Bila san sigura da će se Radana sitit tega vrimena i da će jon bit draga moja letera, koju san jon poslala, u običnoj šakuperti s bulon. Ka u ona, pinku starija, vrimena.
    Ma, Radana ni odgovorila na leteru. Njanci besidu.
Leteru čuvan u računalu. I Radanu.

    Tonobil s njezinin prezimenon je proša i odnija sa sebon lipo sićanje, a ja san se vratila i jopet san tu, ususret dobrin judiman.

    Sila san kraj njizi i slušala kako se meju sebon razgovaradu o jednen bolesniku i da in je mlogo teško. On ne more ništa sa sebon. Jema tešku narav. Ono ča njizi najviše vriđa, je da je grub, pun najgrubji riči za nji'. Ma, uvik i svaki dan. Ponižava i', viče na nji', beštimaje i priti in. I udrija bi i', kad bi moga. Žena mu, koja je bila isto tako betežna i teška, umrila je prin nikoliko dan. Mislili smo da će sad bit lagnje, ali nije. Tako to dura već devetu godinu. Nikor ni moga s njiman du'je izdurat vengo ove naše dobrice. Prošlo je po svita, ma prošlo i o'šlo. One mučidu, naprave posal kako triba, otrpe uvride i beštimje i idu da'je. Ni to lako.

 

 

    Sto puti se pitan kako one to moredu izdurat a druge ne moredu? Ma, one jemadu ono ča mi nemamo, ča nismo ositili. One jemadu iskustvo onega drugega. Potirane su. Bižale su s vrićican u rukan. Ubijali su i'. Palili su in zemju. U škovaceran s metlicon kupili su mozak mladića ča ga je neprijatej propuca, i bižali s njin u crikvu di su i drugi mrtvi ležali. Zamisli, da je mater bila sritna ča jon je je'na o' naših dobric donila mozak o' sina u škovaceri.
- Tako, neka je sve njegovo tude. - A tude su ležala još dvojica njezini' sinova.
    Dragi moji! Kada tak'e dobrice, s tak'im sićanjima njeguju betežnega čovika i svaki dan slušadu beštimje, uvride i poniženja i ne pokažijedu svoju bol i rane, vengo nose i tu'je, čovik ne more nego zafalit Bogu ča in je da forcu tako drito nosit križ i odat s viron da je i to za ničije spasenje.
    Dok san u sebi okrićala njiovu bol, dospila je poruka don Antuna Pećara o Putu križa. Ka da je prispila u pravo vrime. Uvik mislin da je Put križa dil svakega dana i vrimena. Uz čije bi se skute stisli, komu pridali nesriću i nevoju, ko bi nan da forcu do kraja iznit ovi život, s kin bi priskočili onu crtu i poslin smrti prišli u novi život? Ko bi nas dočeka na drugoj bandi, da Njega nima?
    Finalmente i ovi Put križa od don Antuna Pećara potvrđuje mojin dobrican' da je korizma uvik dok judi pate…