Ne znan kako je svit prin živija, ma za nj se ni znalo. Živija je kad boje kad gore, ali je živija.

    U starosti izađedu nike riči o neviri i škercin ka i sad o' pokojneg Pere, al' o'š ne'š, sad je sve prošlo. Nima ga i nimamo višje ča reć. O mrtvin triba reć samo najboje.
    Ma, ostali su Petrumila i dica. I to koja dica! I oni su ostarili a mogli bi, ako Bog da, jedan dan, na materino misto, u dom.   

    Ne ćemo sudit i ne ćemo pripovidat ča je bilo kad je bilo. Ma, dica samo ča nisu na rašpe radi matere. Ne bi mi ulizli u te, kako se reče, obitejske priče, da je mater u svojon kući, ma nije. Ondac sve to ča ne vaja oli jedna strana misli protivac druge da je gulozasta na ono ča mater ostavja, parlataje, piše, širi okolo konfužjun i u tu vriću trpa i one koji tu nimaju ča radit.
Kad čovik uliza u dom, to vavik napravi nikor o' dice. Donese sve karte, daje indiric i jamči da će uredno plaćat trošak za roditeja. Nikor ne zna ča je bilo prin tega. Materino se zdravje pogoršalo. Tribalo je nju višje čuvat, pazit, minjat jon pelenice, dolazit i za sve to jemat force i jubavi.
    Ma, pozan tega ča je napravjeno sve kako triba, počeja je rat meju dicon. Mater je jemala pinez i nekretnine i joščec i' jema.
    Jedno je od dice počelo činit predstave kak'e ne mo'š vidit njanci u teatru. E, to je ono dite za koje nikor ni zna, nikor ga ni vidija, dok mater ni arivala u dom.

 

 

    Svi su morali čut ča se dogodilo, pa je parilo da je mater nikor ukra i doveja je nasilu u dom. Ne ćemo višje o ten dilu priče. Gruba je i još dura.
    Ma, ima dil, mislin, glavni dil o' pripovisti, a to su materini pinezi, u za'nju i nesriknji povrat penšjuna, koji je vazelo dite koje je mater dovelo u dom. To je dite mater i opunomočila.
   U čen je ondac stvar? Stvar je u nikoliko ijad kunic. Radi te mižerje, drugo je dite sve pomaklo, cilu piramidu misne i državne moći. Piše letere, šaje i' na sve strane i svoju nevoju i sramotu diže do neba. Pari mi se da bi ovo mogla bit prava baketina za novinare, ča se na grubi način bavidu tujin nevojan.
   Tako se more dogodit da izvučedu debji kraj oni ča su mater razumili i pomogli joj da se betežna skloni u dom.
   Boje je pošempjat ako jemaš taku dicu, zaudobit sve, ime i prezime. Morebit da je tot tribalo pisat da su se dica tukla ko će višje i boje pomoć materi i ostavit je kući, a ono ča oni ne bi mogli, platili bi materinin pinezin. Ma, ne. Pineze triba spremit!

   Najstrašnije ča se čoviku more dogodit je da pošempja, proprio da poludi za pinezin. Da čovik more privarit rojenu mater ka dite od deset godišć, ši, ma mater privarit kad jemaš pedes't i višje godišć na špalan, ajme! To će reć iskoristit jon starost, vazest jon pineze s računa, primistit i',  prodat kuću, skupit pineze, partit i ne javjat se…, pa se jopet javit i čekat povrat penšjuna… To je prižalosno da ne more bit gorje.

 

   Ma, neka se nikor ne jidi ča ću reć. Ovo se more dogodit samo čoviku prez Boga. Ne govoridu judi za ništa da onde di je Bog na svon mistu da je sve na mistu, a onde di ni tako, ništa ni na svon mistu.
    Nikor i nikad ne zna koliku nevoju more učinit učen čovik oli žena. Mlogo veću od onega koji ne zna ni štit ni držat lapiš u ruku. 
    Tot, di  je na Božje misto sila kunica, pinezi, nima tega ko će dicu pomirit i učinit i' da, na kraju, mater ispratidu u miru, zaje'no ka prava dica.
   ča su to Pere i Petrumila falili, ča je to život iskrivija da poza sebon ostavjadu tako ingordastu dicu?
    Tega joščec jema, ma mi ćemo se okrenit oleandru iz Mirakula i molit Boga da nan dica budu strpjiva, da jemadu pacjencu s nan. Ako čagod i ostane poza nan, neka to bude sićanje, rič koja se vavik naslanjala na vrata o' njijova života, sa žejon da in bude bližje i da jin pomogne.

 

     ča je to ča me boli, ča ne mogu prominit ni napravit da bude drugovačije i bo’je?
    Oću reć da se to dogodilo radi tega, jer nisu jemali skulu u fameji.  Jemadu oni visoke skule i ugled ča in je da bidan i neuk svit. Bili su to vavik oni iza Klisa, Vlaji i Bosanci, dotepenci, jer i' oni tako i danas nazivjedu, ne priznajuć in da i' je ta sirotinja obranila i da bi to jopet učinila kad bi tribalo.
    Ovi su veli mislili petat lupešćinu i pjašku malešnin i siromašnin ka niku žuntu. Ma, privarili su se mlogo.
    Ovi malešni su najdražji Božji mi'jenici i u nevoji su još tišnje s njin.
    Kad život ispila grančicu na kojoj su sidili veli, oni  ča nisu primili Boga u vižite, ča su brzo zaudobili misto oca i matere u fameji, kad padnu na tle, zatrese se  zemja o' srama, a oko njizi na tleju zašuška munita o' života.