čovik uvik jema vrimena ražentat se i izluštrat zrcalo o' mladosti, prid kojin se,  prin mlogo vrimena, ni moga tako dobro ošervat ka sad.
Neka je vid oslabija, lente odebjale, ma sićanje na mlaje dane nikad ni boje ni friškije vengo sad. Ne govori svit zalud da se stari vraćadu na ditinstvo.
Kad bi zrcalo pomrčalo oli se šporkalo o' života, čovik se ne bi višje zagleda u nj. Kupija bi novo i mislija da i drugi višje ništa ne vidu, da su sve zaudobili i da je o' njizi sve dobro sakrija. Potla bi nastavija po svon.

 

Izluštrano zrcalo pari ka da se sve vratilo unatrag, pedeset, šezdeset godišć. Ma, s mačan, ka na misecu. Taki je i život bija.
Di je i kako je dosad sprema grije, ako i' nije ispovida, u kojen škafetinu? Di su stala pusta izventavanja, pa je uvik bija u pravu, pravi pravcati i jedini čovik na svitu?
Koliko je zrcali prominija, koje je sad na redu? To  nikor ne zna, a i on se ne more sitit.

Lipo je kad ti Bog ostavi još pinku vrimena prin kraja, da se čistiš i susritneš sa sebon. To oće reć da otkriješ karte makar prid Bogon, koji ionako sve zna, da vidiš ča si učinija o' života, di si, ča si, koliko pizaš, ča priteže na tvojoj tezuji.
Bože prosti, koji put bila bi dovojna i ona malešna zlatarska da izmiri sve naše vridnote. One koje smo činili drugin, ne one o kojin smo pripovidali naglas, da svi čuju, da se vidu, po ulican i trgovin.

Ni to lako. Jema svita koji cili život potroši na se. Kiti se najlipšin dilin i ričin. Bilo je najboje sve ča je on napravija. Taki o sebi pripovidaju kako i' je cili svit jubija, da su u nji svi bili zagledani…
Ma, ni danas, kad je i ti svit ostarija, ni vele drugovačije. Zaudobili su da vrime teče, da i' je potrošilo, da je o svega ostala samo moreta. Još uvik zajubjeni u se, ne znan ča višje vidu u zdencu. Ma, oni i daje gledaju u nj i jubidu se. 

 

 

Gredu po vižitan, prinosidu o'činjenost cilega svita njijovon lipoton i pomalo se pritvaraju u vele oriđinale malega mista. Oni 'vidu' da i' još uvik svi adočaju, pa se za nji pituraju, izabiru vešte, kapeline. Svi i' jubidu, muški i ženske, jer ni dosta ako to činidu samo muški joli samo ženske.
Kad pop s o'tara reče Gospodin s vami, i to je čudo, jer samo u nji gleda, ka začaran. Bože prosti, ka da je dan samo radi njizi svanija.
Ja i' jopet razumin i virujen da in je potribna misa i molitva i da taki život i nije lip, da in je on morebit težak i težji vengo je bija prin mlogo godin.
Vraćan sve i stavjan na misto di se ta njijova žestoka borba 'za se' začela, di san i' upoznala.
Nismo se nikad dilile. Jedino na Pjaci i to po skulan. Znalo se di je đir o' koje skule. Ma, oni bi isto koji put uletili u naš đir o' ginazije. Obično su išli u skulu, iz koje će omar ić u posal meštrovice, jerbo ni bilo pinez za duje školovanje.
Bile su to šesne divojke. Ma su brzo ižvanpile s Pjace a nike nisu ni dospile do nje. Na Pjaci su padale prve očade, a kad bi prošlo prvo upoznavanje i razgovori, išlo se daje do Sustipana i Zvončaca.
One su završile svoju skulu i otišle. Mlade su meštrovice sticale prve dane rada u Zagori, vraćale se suboton i nedijon kući, donile bi prvu plaću i vraćale se jopet u selo. S vrimena na vrime, čulo se ko se u koga zajubija, ko je s kin. Nike su išle i u druge skule, a  nike su išle i daje. Sve su bile bistre i pametne glavice.
Moje sićanje je zapametilo nikoliko smišni i vridni siromašni divojak'. Svit je govorija da su lipotice. Sve sama i teška sirotinja. Bile su prez čače, koji je joli završija u partizanin joli o' pića. Ma, bilo je lagnje reć da je poginija u partizanin. U svin ovin pričan, matere su bile čistačice, bidele u školi joli lavandere. Meni je srcu priresla fameja di je s materon reslo troje dice, prez čače, stisnuti u prizemnon stanu, nji četvero u je'noj kočeti. Ni bilo izlaženja,  điravanja a ni đeparca suboton. Izać vanka značilo je sist na zidić i gledat kako prolazi svit, ča jemaju na se, kako se nosidu. Na zidiću su se susritali, čakulali, gledali, fermavali, poslin i korteđavali. One nisu jemale ditinstvo ka druga dica. čača je za sebon ostavija jad. Mater je gospojan lušijavala lancune i šumprešavala i' na garbun. Bilo je vele grubo. Tu se prižentala i stara teta. Vični žamor, vika, kontraštavanje zaminili su jiće. U skuli su sve bile dobre i vridne, u kući čiste ka sunce. Proprio, čista sirotinja. Tribalo je brzo završit skulu i nać posal za priživit. U sve se umišalo i adočavanje priko dvora.  Pusti bi korteđanti  prolazili, izdaleka bacali očade prema zidiću, fiščali, sakrivali se iza cabla, da i' mater ne vidi.  Koliko i' je lipi muškardini čekalo!? Svi iz dobri fameja, študenti, lipi i pametni.
Malo pozan nego se mlaja ćer zaposlila, pojavija se ozbijni muškardin. Svojin je bogastvon  odrebatija cilu vojsku korteđanata. Ostali su inpjantani o' čuda. Pale su zadivice: - Alaga! ča je star? Moga bi jon bit čača? ča je našla u tega? Ne'š ti čovika? Oklen se ovi pojavija? -
Ni prošlo velo vrimena i mlaja se, prid njiovin očin, udala. U veliken tonobilu, ka začarana lipotica, za sebon je ostavila tisnu kamaru u prizemnici, dvor i zidić. Za one ča su ostali, u kočeti je bilo pinku šire.
ča je u ten bilo čudnega?  U isto vrime, isto se dogodilo i s drugin smišnican. Prijatejice su se pomalo udajile. Ušle su u novi život, pun puncat svakega Božjega blaga. Ka Pepejuga, na kraju priče. Ma, Bog je isto osta pinku daje, na zidu materine kamare. Onod ni jema mista. Nikor ga ni triba niti ga je tražija. Nji četri, pet postale su žene ozbijni muški, stariji po dvajst godin o njizi. Sve su one, u njiman našle i zaminu za čaču, kojeg nisu nikad upoznale, zaštitu i sikurecu. Muški, dobro stojeći, nisu ni marili za vinčanje. Nike su zvali starin neženjon. Vrime su tukli u kocki a niki u švercu. Nisu se ubili o' posla. Ni in ni triba. Jemali su bogastvo, ime i kolino. Ma, isto, kad su intrali na taku divojačku lipost nisu jon mogli odolit. Njijova je vridnost bila jemat bogastvo i pinez. U ten je bila njijova forca. Mlogo in je godilo prižentat se s lipon i mladon ženicon meju svit. U ten su guštali.
Tako se završilo i priskočilo svo veseje mladenaštva o' naši lipotic. Je, da su i' muži nosili ka relikviju, ma su u isto vrime bili njijovi strogi gospodari i đeložasto in u'odili svaki korak.
Tragovi njijovi' sićanja i danas su naslonjeni na zidić di se zaboravjalo na glad i siromaštvo i na prijatejstva, koja su priko noći nestala.
Njijova dica ne mogu ni zamislit materina ditinstva i neimašćine. Ona su naslidila  ambicjune, koje višje nima ko ranit, jer su niki zauvik partili.
Inšoma, ni mlade nisu višje mlade. Ma, ostala je glad iz prizmenice, dvor i zidić, a cablo do njeg nareslo je ka kuća. I ono je ostarilo.
Ostala je potriba za slobodon, otvorit vrata, zaigrat dilić o' mladosti, sist na zidić i pogledat oće li ko proć i ošervat se, fermat, dobacit koju… Ma, i korteđanti su ostarili joli partili, a ovi drugi ča prolazidu mogli bi in se samo narugat.
U fameji te osićaje nima ko pripoznat i, ka za dišpet, vrime se truje a istina zamotaje u sto karat.
U vrime kad kuća spava, kad te nikor ne zove i ne triba, kad bi i moga čagod napravit joli stvorit, prolije se čaša i pomišaju niki poti. Jopet se najdeš  tamo di si bija.
Sićan se da je ondac dobro dilo bilo primit čovika pod didovu lumbrelu i dopratit ga do kuće, za rojendan, na rivi kupit metar drva i platit fakina da in to odnese u dvor, dovest i' kući za stol i naranit i', bit in prijatej i pomoć.

 

 

Godine donosidu mir. Njega triba fermat, stavit zrcalo prid sebe i tezuju, skinit moretu, priznat da si nikor i ništa, pokrit zdenac, u koji si se zagleda i pogledat Onega gori koji ni jema mista u tvojin dvorin o' karata, jer On oće bit stvaran i istinit. Ma, On je đeložast. On ne će toliko svita, vižita, toliko riči. On te čeka nasamo, u četri joka, u miru sa svakin, i u tišini. Ne'š ti njega pitat. On će tebe pitat. On će te utišit, bit ti prijatej, koji te nikad ne će ostavit.
S Njin ti ne će višje tribat zrcalo. Ošerva' ćeš se u njegovin očin. To će bit sinjal da te je primija.
Vrime je! Pridaj se!