Misec je kolovoz. Odmori su. Najgore je vrime za ulist u ošpidal. Antinin očin triba najbržja pomoć. Ona je dogovorila vižitu u privatneg likara. Ma, na dan vižite, javjadu jon da se dotoreša razbolila i da dojde za dva dana. Ni to bilo lako. Tribalo je s Ante skinit čistu robu i odnit je sa sebon da je ne šporka. Ko će dat drugu? Nima se vrimena ni pinez. Triba i druge pogledat, pomoć jin. Za Antu triba vrimena, ka za dite. Kad je doša dan o' vižite, primi i' dotoreša. Vižita Antu i reče da triba omar u ošpidal. Ka, odlipila se retina. Iza je niki mijur. To triba omar operirat, nima čekanja. Ako mogu ovod, ako ne, ondac va'ja partit u Zagreb. Kad je ona tila platit, dotoreša ni tila vazest ni cente. - A ko će van platit ča činite za ovu sirotinju? Avižajte me da znan ča su odlučili ovi u Splitu. - U ošpidalu su čekali cilo popodne, da se najdu 'pravi' likari, da ga pogledaju i da odlučidu. Finalmente su odlučili. Ante mora omar u Zagreb. Ogladnili, ka dva pasa, kupili su na kiosku dva sendviča i bibitu. Ona mu je kupila još nike robe, ma ne postole, jerbo su Antine noge to'ko betežne i natečene, da ne more ništa stavit na njizi vengo samo nesriknje japanke. Okupan je, čist, privijeni' nog. Sa svin kartan za bolnicu, ujutro je, u šes' uri, uša u tonobil Hitne pomoći i partija u Zagreb. U je'noj vrićici je jema zamotane gaze i sve ča triba za privijanje a u drugoj četiri sendviča, litru i po soka, i bočicu o' po litre donata, u koju mu je ulila crne kave. Ništa ni zaboravila.
Ko će Te sad gledat i redit, moj Ante? Ko će pospremat za Tebon? - Ne boj se! More bit da 'š moć vidit na jedno joko!? Kad se vratiš, bi' ćeš u domu, di će pazit na Te, di 'š jemat ča Ti triba. Ovi poslidnji dil o' vrimena vele je piza i višje nisi moga durat ovaki. Bi' će Ti bo'je, ako'š bit dobar! - Oko jedanajs' uri, ona je nazvala vozača i pitala ga, kako je Ante, je li miran i dokle su arivali. Vozač je reka da je Ante miran, da su kraj Karlovca. Još ima malo. Pozdravila ga je. E, moj Ante i to si doživija da nikor pita za Te, da misli na Te, da Te pozdravi, da za Te moli... Vidiš li da nisi sam na svitu? Kad je, prin niko vrime, uginija Antin pas u staroj poltroni, doša je Cijan dezinfetat kamaru i odnija ga. U kamari su ostali još dva lutalice, prez inidirica. Tu su s Anton ležali, pili, triznili se, u šporkiži i neredu. Ma, ka da su i oni slutili zlo? U poslidnje su vrime bili šerjasti i trizni, nisu pili ni izlazili. Stali su kraj Ante, ka pravi prijate'ji. Jutros, kad je Ante partija u zagrebaški ošpidal, pazikuća je javila policiji. Oni će arivat i zakrakunat Antinu kamaru. Ondac će i ove dvi dižgracje jopet ostat na ulicu. Iako to nikor ne vidi, a ne će, jer nan ni drago gledat grube stvari, oni će se vratit u stari pakal. Kako se za to uvik najde škuža, ovi će put to bit zarad tuge, ča i' je Ante ostavija i ča su ostali na ulici, prez kamare. Sad more arivat 'francuzica'? Ne triba ništa radit, ne triba pomoć ni muči' se. Nima višje Ante u kamari. Triba samo prominit bravu. Ona more poć vazest bicikletu, koju je jutros zavezala za je'nu prizemnu ponistru. Posal na Antinon indiricu je gotov. More vozit da'je. Sto se puti pitan: - Zašto ovo pišen? Za koga? Ko će to proštit, čut? Jema li sirotinja koristi od tega? Nima? - Ondac se jopet sitin Bile kronike, ča je napisa umirov'jeni karlovački župnik, o kojen san već pisala. Sitin se i dobrega p. Stjepana Kuzmića, koji je o njen lipo govorija i koji nan je sviman priporučija da pišemo ako vidimo da nikor čini dobro, najskoli da je pomoga sirotinji koja ne more uzvratit. Jer će svit mislit da je oko nas sve samo crno a nije! Znan ja da ne će ovi naslovi u foje. Bože prosti! Tamo će pisat da je studentica glume pala na provi i dobila potres mozga. Ma, ne zato ča je pala, ča je boli, ča ne će nastupit u pri'stavi, vengo radi tega jer je ničija ćer, pa ondac triba napisat svaku ča se dogodi u fameji da pape bude kuntenat. Eto na! Ma, ča je to? Di smo? ča nas jošćec čeka? Doklen moremo ovako? Ja isto mislin da triba napisat i spomenit se ovi' koje nikor ne će vidit, dat in, napravit in i pomoć in, čut da in je pinku bo'je, vengo je bilo, da je nikor pripozna nji'ovu nevo'ju. Ako intran na nju i dan jon ruku, bit će čoviku lagnje a Bogu milo. Naš je Ante ariva u Zagreb, sam, s dviman vrićican i našon molitvon. Dr'š se, Ante! A ondac, večeras, ka grom iz vedra neba. Ona jav'ja da je Ante jopet u tonobilu Hitne pomoći, da ga vračadu nazad, da ga tribaju najprin vižitat u splisken ošpidalu, a potla s nalazin, triba doć u zagrebaški ošpidal. Srića i Bog, pa policjoti nisu zakrakunali kamaru. Unutra je našla stare lutalice. Donila je tečicu juve i spizu za Antu i rekla jin da ga čekadu i da mu pomognu. Lipo je rekla privatna dotoreša da je mislila da će Antu fermat u našen ošpidalu i napravit mu ča triba prin Zagreba. Ma, o' tega ni ništa bilo. Vidiš li moj Ante kako je grubo kad nisu navikli na Te, kad Te ne poznajedu, kad si ničiji? Tako je hitni slučaj, za nikoliko sati, posta vela poteškoća. A, mi smo se veselili Antinon ozdrav'jenju… Samo Bog zna oćemo li uspit spasit Antin vid i jema li još vrimena za to? Sveta Luce, moli za nj!
Split, 6. kolovoza 2007. god.
|