Bija je petak. Ujutro smo se rano uputili u istočni dil grada, di smo našli malu kuću, na kojon se proširiva krov, ča oće reć' da se kuća širi i reste i da će zamalo vrimena jemat višje kamara i posteja. Matuni na sivernon dilu o' kuće sinjal su da se još gradi.
    Ma, mi smo arivali u vižite.

 

 

    Na ulazu stoji kip Kra'jice mira, a bokun da'je reste cviće. Jema i suncokreti. Još da'je je ošišana zelena trava. Na njon je nikoliko ukrasi o' kamena. S jedne i druge bande o' šentade, stoji po jedan patu'jak.
    Bogumila se nadvila priko ograde i reste da'je uzgor, u arju, ka veli lipi suncobran. Na kraju je stol s katrigan', za kojin ćemo sist kad obajdemo ovu malešnu kuću.
    Pari ka da će dica navalit iz kuće i počet se va'jat po travi, zaigrat na balun oli na vatalo.
    Ma, tote nima dice. Ovo pari je'na malo veća fameja starega i betežnega  svita. Nikoliko i' leži i ne moredu odit, a drugi se libidu, viridu ko je doša u vižite. Šetaju, od kamare do kamare, obilazidu suside.
    Nasrid je ka mali tinel s lipon  Poslidnjon večeron na zidu. Tu je Jela već čapala misto i sa šugamanom, s češjon i nožican u rukan, čeka na red za šišanje.
    Dvi-tri su staričice izašle i čakulaju na šentadi. Kameni patu'jci ka da i' pazidu.

 

 

    Mala izglancana kužina je na kraju 'odnika, a u kapeli se stisnila sestrinska  i kancelarijska potribica sa stolon, računalon i likarijan'. Jedan će dan bit bo'je i drugovačije. Bit će višje mista.
    Lipo je vidit da je najprin napravjeno sve ča triba za stare stanare i da su oni na prvon mistu. Drugo će se pomalo dodat.
    Lipu malu kuću vodi i održaje 'jubav brata s dviman rojenin sestrican, od koji' je jedna medicinska sestra.
    Jedanput in' je Bog mlogo pomoga i spasija i'. Sad mu oni uzvraćadu, dajuć starin i betežnin svu svoju forcu, dare i 'jubav.
    Tote nima beštimja. Ne smi se beštimat. To je jedina zapovist. Ma, kad se to i dogodi, 'prikršitej' ostane sam, nikor ga ne obadaje i projde ka da ni sagrišija.
    U kamaran su po dva čovika oli dvi ženskice.
   Bože moj, svin se bilo drago litratat. Nika se staričica došla žalit da san je 'priskočila'. Skinila je šudar, namistila se, ka na starin litratin i nasmijala se. Lipo je ispala. Proprio za sićanje.
    Obilazeć i', arivala san do kamare, u kojon je odnedavna i naš Ante, o kojen san napisala višje crtic'. Sidi poluležeć', gleda prid sebon, ma ne vidi.
    Voditej mu je donija radio, pa sluša. čist je i miran. Tila san čut ča misli, kako mu je tote…
    Drago mi je bilo čut da je zadovo'jan, da čeka ličenje, ma i njemu je bilo drago čut da
mislimo na nj', da je notan za ošpidal i da će to već bit za koji dan. Bilo mu je pinku težje razumit da se ne more višje vratit u onu šporku i zapušćenu bužu, jer se za njegovo zdrav'je triba borit svaki dan.
    Mora je doznat da višje ne će bit šesto kunic pomoći, koju je prima svaki misec za život, ma, da će zato socijala plaćat mlogo višje o' tega za njegov boravak u ovon malešnoj kući, njegovo ličenje i sve ča bude tribovalo.

 

 

 

    U znak da smo se dobro razumili, dali smo jedno drugon ruku, a ondac je u kamaru ulizla i ona koja ga je našla i sve ga ovo vrime pripravjala i dogovarala pomoć za nj'.
    Ajme meni, lipega li susreta i sriće kad je čuja i pripozna njezin glas. Sve je postalo bo'je, lipše i teplije.
    Asti sto! Ni da i ja ne znan tako, ma tribalo je prin svega dat bokunić ozbi'jniji timbar našen razgovoru, da Anti dojde do glave da višje ništa ne će bit ka ča je prin bilo.
    U ošpidalu su i ovi put intrali na jude kakve smo nikidan nazvali braćon i sestran, jer su tak'i, jer in se još ni pokvarilo srce. Znan ja da i' još jema. Bogu fala! Smili in se na sirotinju i 'jude koji žividu sami i nimaju čovika uza se. Inšoma i oni se susritnu s judin koji to radidu sa srcen. Pa, kad i' Bog spoji, nima ko će i' odbit ko in ne će napravit, najskoli ko će i' pokolebat u nji'ovin trudiman…
    Ante je za'nji put falija. Kad je triba uć u ošpidal, kad su 'brat' i 'sestra' sve dogovorili da ga primidu, on se ukočenija i ni otija ić. Ona je znala da je sutradan jema pošćjer donit šesto kunic socijalne pomoći i da Ante ne će ostat prez nji', da i' oće sam vazest i pofrajat. Nima te sile koja bi Antu bila makla.
    Večeras je drugovačije. Ante dolazi iz malešne kuće i jopet će ga niki 'brat' i nika 'sestra' primit u ošpidal. Sutra počinje ličenje nog', a kad to bude gotovo gre treći put u Zagreb. Ma, ovi put će bit sve kako triba i virujemo da će likari učinit sve da spasidu Antin vid.
    Triba reć kad ne vaja, ma ne samo radi tega da se šporka čovika oli službu, vengo da kažemo da u posal koji radimo s judin triba dodat kućarin dobre voje i jubavi. Kad va'ja, kad čovik napravi čagod drugen čoviku, ju'ski i pošteno, po Božju, triba još višje reć. Neka svit čuje za dobro, neka zna da ga jema i da o sviman nan zavisi ol' će ga bit višje ol' manje, oli ga ne će nikako bit. 
    Jesmo li mi na svon mistu? Živimo li kako Bog zapovida? ča činimo kad vidimo siromaja?     Navalimo li na nj grubin besidan i uvridan?
    Mislin da smo krivi i ondac kad jin ne virujemo i ondac kad nas 'privaridu', kad izventaju da nimaju, da su gladni.
    Zašto? Zato jer nismo na svon mistu, jer nan je svejedno ča je a ča nije. Da se drugovačije ponašamo, mogli bi in' pomoć.
    Doša je niki novi 'siromaj', sija po tleju, dežvida protezu i stavija je isprid sebe. Prosi.
Ondac doznan da jema tonobil, ne niku kantu, i da ga je ostavija na parkirališću. Kad uprosi, stavit će nožnu protezu i odvest se da'je, ne znan di?
    Jedan drugi je zavrnija nogavicu, pod kojon se crni potkoljenica, zagrata je šporkon rukon i otvorija ranu. Ovo je već drugi koji na isti način otvara ranu na nogan. Prez riči je ispružija ruku i prosi. Mlad čovik. Triba poć u likara i ličit se. Ovako će brzo ostat prez noge. Zašto prosi? Triba mu za drogu. To ne more dobit prez pinez.
    Jesmo li, zapravo, na svon mistu? Radimo li svako svoj posal kako triba, oli ka makako po vitru, okrićemo glavu o' nevoje, vidimo je i ne vidimo, jer ni naša, jer nas se ne tiče?
    Triba mlogo vrimena za pomoć samo jednen o' nji'. Ma, isplati se. Jedan prosjak manje, jedan bolesnik manje, je'no malo dilo višje.
    Kad projden ulicon, vidin da nima višje Ante, ma znan da je u dobrin rukan i da višje nikad ne će bit gladan ni gol, da će sličit na čovika i da će nikor mislit na nj.
    Pa, ča ja oću? Otila bi da se to dogodi i drugin, da ispraznimo i očistimo ulice o' siromaja da i nji' sklonimo i pružimo jin ono najmanje ča čovik more.
    Da je barenko u nan mrvu jubavi višje za onega drugega.
    Je'na zraka svitlosti i nade dotakla nas je u onoj malešnoj kući kad je voditej reka da bi otija, na niki način, spasit ove siromaje i prosjake, očistit ulice o' te nevo'je i žalosti. Pomoć jin. Reka je da ga ta misal nepristano prati.
    Lipo je to čut, o' ten znat, lipo je o ten govorit. More bit da nas, jednega dana, bude višje istomisleći', koji će i nad ovakin sviton moć prostrit krov i konačišće juskosti. More bit?!