Probudila san se u dvi ure misleć' da je finila noć ma san se privarila.
- Zima je. Di 'š sad po kamari, provaj jošćec zaspat! -
Ne gre. - Aj' misli pinku ako mo' š, zlamenuj se… -, govorin u sebi, pas' će ti čagod napamet.
Ondac ka iz topa prid jočiman mi zasvitli gotika, gotička subkultura. Ma ča, koja to!? Bože moj, ona iz jučerašnje Slobodne. Pa kako ti more zasvitlit? Crna ka crna noć. ča tu jema svitlit?
Ma, meni je isto zasvitlilo jerbo to nisu stari, ižvanpili Gotičari vengo mladi. Najstariji jema tek dvajstri pramalića, drugi su još mlaji. A di su oni ča se nisu prispili litratat? Kako ne će svitlit? Kad će ako ne sad? (neka se nikor ne najidi ča i' ne ću zvat cilin imenon, vengo Gotičari, jerbo mi je tako lagnje i pinku lipje.)
Jur prin skule je mobitel prinosija vist, a none je dobila befel, prin bublic' o Keka, kupit foje i pogledat svog benjaminka.
Mislin da je ritko koja kuća prez gotičara i da se ne mo' š pravit ka da i' nima, jerbo su oni tu, s nan i mi i' volimo, bili oni pravi gotičari oli samo nji'ovi korteđanti.
Ondac jopet mislin, da san i ja, more bit, bila ka nika gotičarka prin po stolića. Kako ne? Nosila san crnu košu'ju crne gače, crne mokasinke, crni kaput 'treći čovik', francuzicu, kratku kosu.
Na Pjaci bi me zvali Fransoa (ka ono, Sagan), pušila san lulu od jantara i trišnjina drva koju san u Zagrebu vratila Vinku.
To, ča bi se kritičari moga vrimena ošervali, nisan obadavala. ča je ondac bilo drugovačije vengo sad? Jedino to, ča san samo ja bila, ajmo reć, 'gotičarka'. Moja klapa je bila ka vas drugi svit. Nikor se ni intrigava u me, izlazili smo uvik skupa od betulâ do Belvija, od Sustipana do grada, nalazili se na vrj Pjace, šetali, pripovidali. Bilo nas je od mužike, pisama, slika, fotografije, pravi boema… Ja san bila najmlaja. Još san odila u gimnaziju. Njiman san se prižentala s mojin pismama. Sve skupa, bilo nan je lipo.
Joj, pale su mi napamet nike crne košu'je oslikane s malin lubanjan, oli jopet nike druge s rebrima i drugin košćican, pa kad ti takvi gredu ususret pari ti se da i' gledaš na rentgen.
Sićan se da san i ja prin pedes't godin bila dobila jednu lubanju i držala san je u kamari na biblioteci. Kad su prošetale sve kurjožaste vižite i dobro je prigledale, ondac san je dala da'je.
Sustipan je u to vrime bilo lipo i mirno grob'je koje je uvik bilo uk'jučeno u naš noćni đir. I tamo su bile arkade a i greb od moje none Milene, di bi se fermali. U miru bi slušali ribarice ča su plazile svićan po moru i ka inkantani gledali meju grane o' čempresi, kako prolazidu, doklen bi pisnik Kruno u zanosu govorija svoje verše. Gospe moja! Koji su to bili gušti! Jedva nas se čulo.
Vraćali bi se u grad u sitne sate, mirni ka da se vraćamo s blagoslova.
Je, da bi ja ogrizla svaki put kad bi došla kući, ali ča je to bilo naspran moje 'gotičke' osobe, koja je uvik bila svoja, prez obzira na cinu. Bila san s odgojenin, višje siromašnin sviton, čiste savisti i virovala san da je to najvridniji čertifikat na svitu.
Uvik radi oneg nesriknjeg 'ča će reć svit okolo' ja bi dobila porciju. Fala Bogu! Neka su mene moji stari čuvali onako kako su mislili da je najbo'je, a i frušta je izašla iz raja, govorija je svit.
Danas nimam njanci komad crne robe, ni za umrit, a iz mene još uvik ćiri ka nika 'gotičarka'.
Ne štijen Slobodnu, pokojne pogledan priko interneta da ne priskočin koje žalovanje. To je sve.

 

 

 

Ma ka i drugi dil kurjožastega svita otila san vidit ča danas činidu i kako to žividu mladi Gotičari pa san kopirala stranicu Slobodne, da je malo bo'je vidin. Izbližjega.
Asti sto miši! Evo na! Jopet potriba mlajarije da se izrazi drugovačije. Ma vidi ti nji'! I to u duhu gotike. Eto litratanih mladic'. Sve odlikaši, dobričine i mirojupci. Kažedu za se da nisu opasni niti zločesti, ne pripadaju okultnome, rekli su ne: magiji, orgijan, ne kolju kokoši, ne rižedu žile. Znači, ne pijedu krv.
Otpor prema zlu pokažijedu glazbon i posebnin veštitiman. Nino se fali da je otkrija alternativnu glazbu. Žalosni su jerbo su svaki čas žrtva nasrt'jivih i fizički agresivnih 'cajkaša' a takvi obračuni nisu u skladu s njiovon životnon filozofijon.
Ma, ni to, ni sve. Nji' priko joka gleda i drugi svit, oni koji se još ni prisvuka. More bit, višje oni stariji. Izazivjedu i' upadican' i svakojakin dobacivanjen.  Mlaji nimaju vrimena za ošervat se na nji'. Pari se, da ženske ka ženske, bo'je prolazidu.
Žaj mi je puno Ivana (15) kojen su rodite'ji zapalili crnu robu i pisme. Žaj mi je da nisu jemali pacjence i višje vrimena. Ivan mi se malo prilipija na srce, pa tu njegovu kratku izjavu čujen ka vapaj za pomoć.
Dragi rodite'ji, ko more bo'je pomoć Vašen Ivanu od Vas. Nemojte omar s uvjetin. Najprin se zagrlite, sidnite zajedno, ondac ga poslušajte i počujte ča Van oće reć. Pacjenca! Ne prišite, ondac Vi kažite koju. I ne mora bit uvik i samo komanda. U ovaken svitu ni lako ni mlajariji bordižavat. Morete li zamislit da je u Vašin rukan jedan o' k'juči budućnosti za Vašeg Ivana?
Prin nikoliko dan jopet san čula one tri lipe riči, koje kad dite naući u fameji, nima straja da će zaboravit i da će zastranit, da će mu tribat samo crni veštit i najžešća glazba s 'dramatičnim' stihovima i da će na ulici postat žrtva raspamećenih 'cajkaša'. To su riči: Molin, fala, oprosti. Naravno, prin tega ste i vi morali čut te riči, jerbo ako i' niste čuli niste i' mogli ni prinit. Ni ovo novo, ma triba i' se dikod sitit i ponovit.
Niki dan san bila u jednu butigu o' lancuni. Kad san kupila ča mi je tribalo i dobila vrićicu u ruke, rekla san prodavačici: - Fala Van, bili ste strp'jivi i 'jubazni. - Ona je ostala incukana, nasmijala se, a ja san je pitala: - …ol' Van to još nikor ni reka? -
- Ne. - odgovorila je.
Eto, di smo mi svitu moj! A ko će nan reć fala, ko nas vidi, ko čuje, ko sluša, kad su nan u ušiman oni' botuni, a kad je tako ni triba ni pozdravit ni triba ništa! To ka da oćemo reć ako nan poznati dolazi ususret: - Ne prikidaj me, pusti me na miru. Ol' ne vidiš da slušan? -
Ka mutavi. Tako je najbo'je. A nije tako.

 

Ajme meni! Draga mlajarijo, ko van je sročija ovako grubo, conkulavo obilježje Gotičkeg pokreta: glazbeno-stilsko-ideološki sustav. Ne ću van se u to mišat… Ajme!

I ono šoto, jošćec uokvireno: - Gotički pokret zapravo je glazbeno-stilsko-ideološki sustav začet sedamdesetih u Londonu, okrunjen nešto žešćom glazbom koja obiluje vrlo dramatičnim stihovima, neobičnim „bljedolikim'' imidžem koji inspiraciju crpi u kombiniranju viktorijanskog stila sa „sado-mazo“ i futurističkim elementima, a nadahnuće nalaze i u poeziji (Byron, Poe), kultnim filmovima i mitološkim bićima kao što su vampiri, demoni i vilenjaci. -

ča je Ingleži, di ste? Jezičari!? Privodite'ji!? Ajme!
Da je paket ariva iz Londre to bi svak pripozna i da niste napisali.
Ma sad je, na kraju, priča napravila tombulu, pa ono ča govorite da nije - je.
Kako se nadahnjujete ''sado-mazo'' kombinacjunima? Jemate li lisice, bičeve, morete i sve istrumente ča triba? Trošite li i na to pineze u sado-mazo dućanima joli jošćec samo kurjožavate kroz bužu? Jeste li znali i za otel 'sado-mazo' ? I demoni vas nadahnjuju!? Pa ča vas ondac muči? Najprin ste rekli da vas žalosti zlo koje je zavatilo svit, sveprisutno zlo.
Koje sve šporkarije moran radi vas proštit, ne bi li vas bo'je razumila!?
More bit ste još dobri, ka ča bi ja otila da jeste, da vas mogu branit prid drugin, pa sve to lipo u miru gledate na izdašnim TV - postajan, raznin You Tube-ima i blogovin, do jutra. Ne daj Bože da van ikad nadahnuće bude životopis Byron-a i Poe-a. Ponav'jan: životopis!
Ja san se s mojon malon omar uvatila. Zašto? Zato jer je skočila na me i rekla da Gotičari nisu sotonjare i da ovo ča piše na kraju članka ni istina.  - Vidiš li ča su novine?  ča televizija? Vidiš li kako si se zajapurila, užgala radi neistine. Jema vrimena, naučit ćeš. -
Mlajarijo moja! Ja san vas morala pitat ča san pitala, jer san tako proštila. A vi se pinku zamislite.
I jošćec je'na rič: ne bi va'jalo sudit čovika po veštitu i postolan. čovik je iznutra, svaki za se, jedincat. Njemu je dano bit. I ja virujen da svi vi u sebi nosite potribu za pripadanjen, že'ju da budete pri'vaćeni takvi, kakve vas je Bog stvorija. Jemate mi'jun način' za to reć i pokazat. Ne triba cilu planetu zavit u crno za pokazat da ne želimo, da ne ćemo zlo. Zlo reste ka ča reste i dobro. Ono je i u nan. Kad bi ga barenko uspili izbacit? Taj život i ni drugo vengo vična borba dobra i zla. More bit da je nikor o' vas i čuja kako čovik 'triba radit na sebi'. Ol' u van nima že'je da budete posebni, rekli bi vi, originalni, jedinstveni, svoji, vengo vas triba nikor vodit? S takvin od medija izbezum'jenin mladin sviton, Veliki brat more činit ča ga vo'ja i to čini. Vi za njega postajete osvojeni i pokoreni prostor.
Zlo ne triba jošćec i uvozit. Ono se gura od granice do granice ka radioaktivna škovaca, a nan nesriknjacin je uvik dražje kad je paket izvanka, pa makar unutra bija i Gargamel.
Samo da nije naš!
Ja užan reć da se triba borit ZA DOBRO, uzgojit ga i ono će rest. Okrenit se prema dobru, ka ča se suncokreti okričedu prema suncu. I bit će svitlost u nan i meju nan.

http://arhiv.slobodnadalmacija.hr/20080123/mozaik01.asp

Split, 25. siječnja 2008. god.