Vidili smo mi kako je to kad svit daje o' viška. Ma, teško'š intrat na onu udovicu koja je dala za'nja dva novčića, oliti sve ča je jemala o' svoje sirotinje.
Ritko se to vidi u našen gradu, a ne znan jema li tega i u Lipoj našoj. Zato ne va'ja kratit besidu za reć dobro i pokazat ga svitu.
Ova stara spli'ska fameja živila je skromno i šparenjožasto. Nisu davali na luše, nisu lako itali robu, duperali su jaglicu, krpali, ka i život. Ostali su isti i ka penšjunati. Nisu se prominili. Ma, kako su svi dočekali visoke godine, počeli su se pomalo tribit. Na kraju su ostale još dvi sestrice s višje od devedes't godišć. Nikor ni jema svoju fameju, to oće reć da su cili život bili skupa za istin stolon i s iston kacjolon, kako je ostalo pozan matere i čače.
S njiman je ostala i zem'ja na Kili, a skupjali su se i pinezi ča bi ostali o' miseca, na rpi.
O' že'je da osiguraju starost, godinan su inženjavali kako i komu dat zemju i pineze, darovat i' da se napravi kuća za stare i nemoćne, ma naročito za ne-imućne, kako su rekle dvi priostale sestrice.
Ma, danas je gotovo. Prispili smo do punte kad višje ne moremo naprid. Gremo s ovin ča jemamo.
Večeras će na zemji ove šparenjožaste fameje bit položen i blagoslov'jen kamen teme'jac.
Jema pinez za prizemje, di će bit kužina za 500 obroka i praonica. Sve je plaćeno, a Matošića dom će rest i penjat će se u arju koliko bude resla i naša savist i savist svi' u oven gradu, barenko oni' ča se ufaju da i' starost ne će priskočit, ako Bog da.
Malo smo zaprišili u že'ji da Matošićke vididu barenko kamen temejac i prvu lopatu na zem'ji koju su one darovale. Nji'ova je že'ja bila i ostala da ovi dar primi naša Crikva. Daj Bože da se to zbude!
Fala fameji Matošić, fala i Katoliškoj udruzi Lovretu ča je privatila že'ju ove fameje da jin' pomogne tražit onega ko će primit ovi dar i nastavit gradnju Matošića doma do kraja.
Fala sviman koji će u šparenjožastoj fameji Matošić nać lipi uzor dobrote i juskosti i slidit ga.
Split, 1. kolovoza 2007. god.
