Najveću mižerju ne čini niki drugi svit, drugovačije rojen o' nas, odlipjen o' sviju, sinjan kaštigon. Ne, ni to kaštig ozgar. To su naši befeli. To je riceta, koju dobro umisimo, pa kad uskisnemo i narestemo, pravimo se višji, viđeniji, bo'ji.
    Moremo zaklopit je'no joko, a morebit i oba, kad triba vidit da jema i oni drugi', koji bi znali isto ka i mi, stavjat u se i na se, kad bi jemali. Ma, mi smo ji' šuperali iz našega svita, joli ka dil fameje joli, lagnje rečeno, ka dil o' društva. Kad rečemo ovu za'nju, ondac mižerja postaje svačija, a to ti je ka ničija. To se vidi svaki dan.

 

 

    Oni su, ka nan za dišpet, živi, grubo živi. Grubo i' je vidit, još grubje pasat kraj njizi. Vavik mislimo kako ji ni sram take, kosate, bradate, šporke, smrdjive, s otvorenin ranan na nogan, po škovacan…, i rečemo jin da su sami krivi ča in je tako. Jerbo, da oni nisu krivi, ne bi ni mi bili pravi.
    Gren po oven zvizdanu i mislin di su se sakrili, u koju bužu… Ni nje nima danas. Di je zapela?

 

 

    Sveta je nedija mlogima još samo sinjal da ne triba radit, da je dovo'jno sist za stol, ako more, u lad, pojist i popit. Pribrojit svoje u glavi i ako su svi na mistu, stavit prst u uvo i bit kuntenat sa sebon. Tako 'vridan', čekaš da ti Bog providi još bokun života. Kad svi naučimo tako lipo mislit i zatvorit krug o' svoje fameje, pari ti se da je cili svit sritan, da nikomu ništa ne fali.
    Kad tamo, ka da je ko prosuja nevoju na sve kantune. Oni su ostali u gradu, u bužan o' kamare, u kojin su se pomišale štrace i faše, poti i teče, di je struja odavna iskjučena, a voda se vazimje izvanka.  Stara kočeta udubjena do tleja, prez lancuna, kušin o' zamotanih krpa… Po tleju boti'je. Kako jin pomoć?
    Ante se jučer prida. Jedva mu je ošišala kosu i bradu. Vodu je donila izvanka, u maštilu. Robu ča je skinila  tribalo je bacit u vriću. Otvorene rane na nogan rumenile su se ka žerava. Koliko bi puti dosad donila spizu i robu, uredila i pospremila, a kad bi izašla, poza  njon bi izaša i Ante, s botijon po vino. Sutra bi bilo jopet po staron. Ma, ona ni sustajala, najskoli radi ranâ, koje je tribalo redit. Bog je tija da dura, da je Ante joščec tu. Dolazili su i drugi. Tu bi po tleju, umorni, legli, zaspali, probudili se i išli da'je.
    Ma, jubav se ni dala uvridit. Sve je trpila. Nikad se ni umorila. Sila bi s njiman na zidić, tila jin bit bližje, razumit ji'. Ma, oni nisu višje mogli bit bo'ji ni drugovačiji. Vrime i' je ruvinalo.
    Ante jema rod koji živi vanka, niku rodicu. Ona doputuje vidit ča je i more li se Ante smistit u koji dom. Jedanput je tila da Ante gre u ošpidal, pa otle u niki dom, da ondac ona more zapasat tu bužu, očistit, zakrakunat i vratit se natrag.
    Jedan dan, kad višje ne bude Ante, ta će nevoja ostat rodici.
    Je li doša ti dan? Je li se Ante zapravo prida. Je li ga ubila žega joli mu je pala forca, pa ne more višje sa sebon? Ne, Ante je najposlin izgubija vid. Ne vidi višje. To nikon ni reka. To je ona vidila. Vidila je nikidan njegov pogled, njegove joči, koje nidir nisu gledale. Kad se dogodilo? Kako? Ante to ne zna reć.  Oto je pomoć Božja, pomoć po kojon je Ante razumija da ne more višje sam, da mora sve ostavit i poć u kuću di će mu niki drugi judi pomoć živit ka čoviku.
    Ona će ga sutra odvest u likara i napravit ča triba. Uredi' će ga ka i puno puti dosad.
    Njemu i drugin, s kojiman je dilija spizu iz iste tećice, triba puno jubavi, ka u svakoj fameji.
Oni nisu gluvi ni bez osićaja. Njiman se triba, ako oćemo uspit, pridat cili čovik i zaudobit na se, ka da te nima. Ko će to dat?

    Ona danas govori Domini: - Domina moja! Znaš li ti da te ja mlogo volin? - Dominine se joči zasvitle na šporken licu, pa reče: - Joli su ti to samo riči, jol' ti je tako i u srcu? Voliš li me srcen? -
    - Volin te cilin srcen! - reče jon ona.
Poslin tega je sve mogla. Domina je pristala da ona donese vodu, da je okupa, promini, da bacidu staru robu u škovace.
    Jopet je sa sebon izvanka donila dvi pune vriće iz škovaca. Ona svaki dan kupi i u velike vriće jopet baca vanka da Domina ne vidi. Domina donosi druge. Po tleju je plastika, pinjate, šporkiža, botilje o' vina. Pari se čoviku da je kod sviju isti neprijatej, ista botija.
    - Ne mogu ti ja pit vodu. Drčen kad pijen vodu. Moran popit malo vina! - , govori Domina.         Svejedno, ne more se taki svit ostavit. I nji svaki dan triba vidit, donit in tećicu, udobrovo'jit i', ražentat, priobuć i', odnit jin škovace, jer će se svi infetat.
    Morebit da i' Bog drži na životu samo da nan pokaže ča i kako jin tribamo pomoć?
   To je bliž'ji, ma ne oni ča ga mi izaberemo. To je oni koji nan nikad ne će uzvratit ni razumit ča je sve to tribalo činit.
    Ti je šporki posal, skula s najmanje đaka.
    Oni ča je završidu, nimaju višje sebe, a arju koju dišedu daju drugin u starin bužan, prez cakla na ponistri, prez vode i struje, meju škovacan, iščuć čovika koga smo zaudobili i izgubili. Mižerjasti, ka fameja i društvo.