STARI ALBUN - Stranica 4 

Bepo: - Popeli smo se skalan, vidimo svudir čisto ka u apoteku: hodnici, tineli… ma sve!

Našli smo i' di igradu domino i čekadu da mine žega, a ondac su se, ko s 'odalicom, ko s kroculan oli s karoceton, nikor s rukan podboltanin šoto bubriga, pomalo liftom spušćali u đardin.

Trenuci odmora

Nikor se ferma pa čita ća piše na nikoj karti. Gledamo i mi, a ono, moj čovik, na karti piše velikin slovin: JELOVNIK. Ma vidi ti tega, znaš omar ća ćeš jist cilu šetimanu. I znaš di si doša – nima mesa u petak! Jesi li vidila, Mare moja?

Pripovjedač: - Bepo i Mare poćirili su Krišpinu Petromilu koja je bila na molitvi u kapelici. Pari kuntenta.

A ta kapelica je lipo malo misto na prvemu podu o' Doma. Sve iz nje čuješ u svojoj kamari.

Mare: - E moj Bepo, uvik san mislila, kako ću barenko u stare dane višje Boga molit. Je li arivalo to vrime? Pari mi se da je… Bože moj, koja lipost!

                                        Euharistijsko slavlje u domskoj kapelici

Krišpin:  - A dojdu njima i biskupi. Na druga mista dojdu samo kad se dica krizmavadu.

Euharistijsko slavlje za Dan obitelji

Mare: - Meni su pripovidali da in i mladi popići dolazidu, da in pomažedu, sviradu in i pivadu…

Božićno bdijenje sa zborom bogoslova

                                                  Bogoslovi: Za tebe ću ja živjeti

Pripovjedač: - I tako Krišpin s Bepom i Marom gre daje vidit i pitat druge ća radidu.

Tjelovježba

Krišpin: - Deboto svaki dan činidu gimnastiku, ondac piturajedu svilene šudare s pinelon i bojican, lipidu škatule dekoracjuniman, pravidu cviće o krep-karte u sto koluri… asti sto miši! Svašta radi ovi svit.

Radno-okupaciona terapija

A  fala Bogu, i ovde jema svita ća ništa ne radi,- pripovida jedna - ća mu se ništa ne da, ća višje ne vidi, ća ne more puno sidit.
Pa ondac jema i oni kombinirani: koji ne moredu ništa radit, pa udru u parlativu, ma sve se to na kraju nikako štiva i poklopi i bude dobro i smišno.
A kad višje ne mogu sami, ranidu i' i tetošu ka malu dicu. Nima ti tu ranic, oni to zovedu: Dekubitus. Ne, ne!
Govoridu, da je ovi svit ća radi ovod sa stariman, puno dobar, radišan i vicast.  Neka in je sve blagoslovjeno!